Yehya Resûl îro di daxuyaniyekê de got, Amerîkiyan gelek caran bi bêberpirsiyarî her tiştê ku dikare têgihîştinê û destpêkirina danûstandinên dualî têk bibe, kirine.

Got jî: “Amerîka şeva borî êrîşeke asmanî li nîvê taxeke niştecihbûnê li Bexdayê pêk anî, bi awayekî giringiyê neda jiyana sivîlan û yasayên navdewletî.”

Yehya Resûl got: “Ev metirsî li ser aştiyê ye, serweriya Iraqê binpê dike û jiyana gelê me dixe metirsiyê. Tiştê metirsîdar jî ew e ku Hevpeymaniya Navdewletî sedem û armancên ku ji bo wan li ser axa me ne, derbas dike.”

Herwiha got: “Ev kiryara han ji her demê zêdetir dihêle ku hikûmeta Îraqê erkê vê hevpeymaniyê bi dawî bîne, ku bûye faktera bêaramiyê li Îraqê û metirsiya wê yekê heye ku Îraqê bikişîne nava xeleka nakokiyan.”

Peyamnêrê K24ê şeva borî gortibû, li navçeya Meştelê ya Bexdayê otomobîlek ji aliyê dronekê ve hat armanckirin û di encamê de 3 kes hatin kuştin ku 2 ji wan serkirdeyên Heşda Şeibî ne.

Li gorî zanyariyan, 2 ji kuştiyan serkirdeyên Heşda Şeibî (Ebû Baqir Saidî û Arkan Elyawî) hatine kuştin û Hizbullaha Iraqî jî di daxuyaniyekê de kuştina wan piştrast kiriye.

Di vê derbar de jî, Fermandehiya Navendî ya Amerîkayê (CENTCOM) ragihand, hêzên wan êrişek li Bexdayê pêk aniye û tê de fermandarekî Hizbullaha Iraqê kirine armanc.