Rêveberê berê yê polîsê navçe û nahiyeyên Kerkûkê Serhad Qadir, ji Rûdawê re ragihand ku danîna wêneyên merciyê bilind ê şîeyên Iraqê Elî Sîstanî li ser hemû dezgehên hikûmî, biryara Fermandariya Operasyonên Taybet a Kerkûkê ye û hêzên emnî yên li wî bajarê jî nikarin wê biryarê bicih nekin.”

Serhad Qadir got, “Hêzên polîs neçar in ku wan biryaran cîbicî bikin û nikarin li dijî wan biryaran tevbigerin û wan wêneyan bînin xwarê.”

Ev biryara Fermandariya Operasyonên Taybet a Kerkûkê ya danîna wêneyên Elî Sîstanî li hemû fermangehan, di demekê de ye ku li Iraqê jibilî wêneyên serokomar û serokwezîrên wî welatî, danîna wêneyên kesekî din qedexe ye.

Cîgirê Serokê Parlamentoya Iraqê, Beşîr Hedad got ku hinek alî dixwazin li Kerkûkê bibin xwedî biryar û diyar kir, “Ew mezhebên diyar jî xwedî heman armancan in. Ev jî bi sernakeve, ji ber ku vê yekê pêkhateyên din jî nîgeran kiriye. Lê dibe bi rêkeftinan pirsgirêk werin çareserkirin.”

Li nav bazar û cihên giştî jî li ser wesayetên polîs û polîsê hatinûçûnê jî wêneyên merciyê bilind ê şîeyên Iraqê Elî Sîstanî hatine danîn û ev yek jî bûye cihê nerazîbûn û nîgeraniyê li gel xelkê.

Hemwelatiyekî xelkê Kerkûkê yê bi navê Hêriş Casim, ji Rûdawê re ragihand, “Wêneyên Sîstanî bi awayekî dûr ji siyaset û hiqûqê tên danîn. Çawa ev wêne li fermangehên fermî tên danîn? Ev kesekî di nav yasa an jî siyasetê de nîne. Danîna wêneyên kesayetan li fermangehên fermî karekî ne baş û ne yasayî ye.”

Xwendekarê zanîngehê, Ebdûlsebûr Mihemed jî li ser vê rewşê dibêje, “Dema em diçin dezgehên fermî yên li Kerkûkê, em rastî wêneyên Elî Sîstanî tên. Vê rewşê bi ti awayî peywendî bi yasa û rêkarên dewletê ve nîne. Ev kar ne baş e û bûye cihê nîgeraniyê.”

Ew biryara Fermandariya Operasyonên Taybet a Kerkûkê, weke ku bo heyama 2 demjimêran be, hatibû belavkirin, lêbelê ev maweyê hefteyekê ye, wêneyên Sîstanî li fermangehên fermî li Kerkûkê nehatine rakirin. Ew fermandarî tekez jî dike ku wêneyên Sîstanî nayên rakirin.