Li gorî ragihandina rayedarê Heşda Şeibî Kerîm Nûrî , ku hêzên wan dixwazin sînorên parêzgeha Kerkûkê tev de kontrol bikin û ji wir zêdetir jî pêşve naçin.

Îro 20-10-2017, ji demjimêr 08.00ê sibê ve di navbera hêzên pêşmerge û hêzên Heşda Şeibî û yên Iraqî de şer û pevçûnên giran hene.

Serkirdeyê Heşda Şeibî Kerîm Nûrî derbarê êrîşa îro de got: “Pêşveçûna me ji bo kontrolkirina sînorên parêzgeha Kerkûkê ye û bi ti awayî em sînorên parêzgehê derbas nakin.”

Li ser vê yekê Fermandariya Giştî ya Hêzên Pêşmergeyên Kurdistanê jî daxuyaniyek belav kir û ragihand, ku mîlîsên Heşda Şeibî bi çekên amerîkî û bi beşdarbûna topxaneyên Îranê êrîşeke berfireh kirine ser hêzên pêşmerge li Pirdê.

Di daxuyaniyê de tê gotin, ku heta niha hemû êrîşên wan hatine têkbirin û zêdetirî 10 hummer û tankekî abrams jî hatine jinavbirin.

Di dawiya daxuyaniyê de tê gotin: “Diyare armanca vê êrîşê ew e, ku hikûmeta Iraqê dixwaze heta sînorên dawî yê îdareya parêzgeha Kerkûkê kontrol bike.”

Bajarokê Pirdê dikeve bakurê rojavayê Kerkûkê û 55 kîlometreyan ji Hewlêrê dûr e. Pirdê ji aliyê îdarî ve bi Kerkûkê ve girêdayiye.