Îro Şêwirmendê Encûmena Asayişa Herêma Kurdistanê Mesrûr Barzanî pêşwazî li Cîgirê Sekreterê Wezîrê Derveyê Amerîka yê Karubarê Rojhilata Navîn Andrew Peek kir.

Di hevdîtinê de pêşhatên siyasî û rewşa navçeyên Kurdistanê yên li derveyî îdareya Herêma Kurdistanê û destpêkirina qonaxeke nû ya çareserkirina pirsên di navbera Hewlêr û Bexdayê de mane guftûgo kirin.

Di wê hevdîtinê de, pêşwazî li biryar û rêkeftina hinardekirina petrola Kerkûkê di riya boriyên Herêma Kurdistanê re bo cîhanê hat kirin û bi pêngaveke girîng ji bo çareserkirina wan pirsan binav kirin.

Mesrûr Barzanî û Andrew Peek derbarê asayîkirina rewşa navçeyên Kurdistanî yên li derveyî îdareya Herêma Kurdistanê de, tekezî li asayîkirin û vekirina tevahiya riyan, pakirina mînên vedayî û dabînkirina xizmetguzariyên sereke ji wan navçeyan re kirin.

Guftûgokirina destpêkirina qonaxeke nû ya bi hev re karkirina bi hikûmeta Iraqê re ji bo çareserkirina pirsgirêk û nakokiyan, aliyekî din ê hevdîtina her du aliyan bû.