Nûrî Birîmo ku endamê serkirdatiya PDK-Sê ye, ji malpera KDP.info re ragihand: “Pêşmergeyên Roj dê vegerin Rojavayê Kurdistanê û dê li wir navçeyên xwe biparêzin. Lê Pêşmerge dê tenê bi riya rêkeftineke navdewletî vegerin.”

Birîmo wiha got: “Pêşmerge li wir têkel bi ti hêzeke leşkerî li Sûriye û Rojavayê Kurdistanê nabin û fermana xwe jî ji kesî ji wan wernagrin.”

Derbarê gotinên PYDê ku dibêje, bila Pêşmerge tevlî hêzên me bibe, Nûrî Birîmo wiha domand: “Emê bi mercekê bibin şirîkê PYDê, ku Pêşmerge nebin beşek ji hêzên wan, ji ber ku em û Pêşmerge ne endamên PYDê ne, ku rojekê navekî erebî jî li hêzên me bike. Pêşmerge xwedî navê xwe ye û ti navekî din qebûl nake.”

Birîmo ragihand: “Leşkerên Roj hatin biçekirin û bi awayekî baş perwerdeya leşkerî dîtine, lewma jî niha amade ne bo parastina axa Kurdistanê. Ew Pêşmerge di şerê li dijî DAIŞê de beşdar bûne û heta niha 45 şehîd dane bo parastina axa Kurdistanê ya pîroz.”