Doh Hêzên Sûriyeya Demokratîk (HSD) û Hikûmeta Şamê dest bi pêvajoya veguhertina nêzîkî 250 dîlan kirin.

Ramî Ebdulrehman bû mêvanê bultena Rojavaya ya ajansa Rûdawê û behsa pêşhatên herî dawî yên li Sûriyeyê kir.

Ramî Ebdulrehman ragihand ku di navbera Hikûmeta Şamê û taxên Meclisên Şêx Meqsûd û Eşrefiyeyê de 246 kes hatine azadkirin.

Ebdulrehman diyar kir hinek dîl îro hatin berdan hin dîl jî mane ku nehatine berdan.

Wî da zanîn ku çend girtiyên Şamê hatine azadkirin û ev jî di çarçoveya rêkeftina HSD û Hikûmeta Şamê de bûye.

Ebdulrehman behsa pêşhatên dawî yên li Sûriyeyê kir û got, "Em hêvî dikin ev bi hev guherîna dîlan berdewam bike û Şingaleke din, komkujiyeke din a beravê careke din pêk neyê û aştî li vê herêmê pêk were.”

Rêveberê SOHRê bal kişand ser daxuyaniyên belavkirina fitneyê ku li dijî Kurdan û HSDyê tên kirin û got:

"Îro min dît kesekî serbazî ji kanaleke Erebî re digot, HSD alîkariyê ji Îsraîlê distîne û alîkarê Îsraîlê ye û girêdayî wê ye ku di vê dema hestiyar de Îsraîl êrişî Sûriyeyê dike.

Pêwîst e ew kesên ji kanalên Erebî re dipeyivin bên bêdengkirin da ku fitne durist nebe."

Ebdulrehman rexne li "Partiya Nû" girt û got, "Ew kesên Partiya Nû fitneyê durist dikin.

Kesek ji wan di kanalên asmanî yên Erebî de diaxive û nijadperestiyê dike dijî Kurdan diaxive. Dibêje Kurd koçber in, Kurd ev 60 sal in li Sûriyeyê koçber in.

Kurd beşekî mezin ê Sûriyeyê ne, çawa dibêjin Kurd koçber in.

Eger hûn dibêjin HSD hevkarê Îsraîlê ye bila Şam hemû rêkeftinên xwe yên bi HSDyê re bi dawî bike û li dijî Kurdan dest bi şer bikin çawa ku we dijî Elewiyan dest bi şer kiribû.

Ti kes ne bi Elewiyan re bû, Kurd bi HSDyê re ne, Amerîka alîkariyê dide HSDyê.

Eger şer li dijî Kurdan were destpêkirin ti kes nikare destê xwe bide Kurdan. Helebceyeke din dubare nabe û careke din Enfal pêk nayê."

“Kujerên Laziqiyeyê divê bên dadgehîkirin”

Ebdulrehman bal kişand ser komkujiyên ku li Laziqiyeyê pêk hatine û got:

"Li bûyerên beravê yên li Laziqiyeyê hezar û 712 Elewiyên sivîl hatin kuştin. Ew ji aliyê hêzên çekdar ve bi awayên cuda cuda hatin kuştin."

Rêveberê Banka Navendî ya Banyasê Ebû Silêman hat kuştin û cenazeyê wî hat şewitandin. Cenazeyên 2 kurên wî û cîranên wî jî hatin şewitandin.

Bi deng û reng belge di destên min de hene. Ew kesên ku ji me re diaxivin behsa van komkujiyan dikin.

Ferqa van komkujiyan ji wan komkujiyên li Şingalê hatine kirin nîne.

Ev komkujiyên paqijkirina nijadî ne, ev jenosid e. Eger civaka navneteweyî û medyaya pîroz behsa wan komkujiyan nekira bi dehan hezar Elewiyên din dê bihatana qetilkirin.

Komên terorîst ew kuştin, eger ew kes neyên dadgehîkirin dê Sûriye nebe Sûriyeyeke aram.

Li Brîtanyayê metirsî li ser jiyana min heye. Ez çawa vegerim Sûriyeyê.”