Li Bakurê Kurdistanê û Tirkiyê, ligel nêzîkbûna hilbijartinan serdanên partiyên siyasî û berbijêran bo alî û partiyên siyasî zêde bûne.

Li Amedê roja Çarşemê 26ê Nîsanê şandeke Partiya Dad û Geşepêdanê (AK Partî) bi serokatiya berbijêrê parlamenteriyê yê rêza yekemîn ê AK Partiyê Galip Ensarioglu, serdana navenda PDK Bakurê kir.

Endamên şanda AK Partiyê ji aliyê Serokê Giştî yê PDK Bakur Sertaç Bucak û rêveberiya wê partiyê ve hatin pêşwazîkirin.

Galip Ensarioglu li ser hesabê xwe yê Twitterê behsa wê serdan û civînê kiriye û ragihandiye: “Me bi Serokê Şaxa Amedê M. Şerif Aydin re serdana Serokê Giştî yê PDK Bakur Sertaç Bucak û rêveberiya wî kir. Ez ji bo mêvanperweriyê spasiya serokê hêja û rêveberiya wî dikim.”