Tevî ku meha Nîsanê ye berf û baran û serma li Bakurê Kurdistanê berdewam e. Saziya Keşnasiyê ya Tirkiyê ragihand ku bi giştî li parêzgehên Bakurê Kurdistanê û Tirkiyê baraneke zêde dibare.

Saziya Keşnasiyê dibêje, bi taybetî Şirnex û Colemêrg li bajarên Bakurê Kurdistanê baraneke zêde dibare û egera lehiyê heye. Li herêmê pileyên germê heta 2-4 pile dadikevin û hewa sar dibe.

Li gor Saziya Keşnasiyê, bayekî zêde radibe û ji welatiyan daxwaz daxwaz dike ku tedbîrên xwe werbigrin û eger heye di trafîkê de pirsgirêk derkevin.

Herwiha li parêzgehên Çewlig û Xarpêtê yên Bakurê Kurdistanê, doh bi şev 11ê Nîsanê teyrok barî û bandoreke nerênî li jiyanê kir. 13emîn Rêveberiya Keşnasiyê ya Herêmê bo her du bajaran hişyariya lehiyê da û ji welatiyan daxwaz kir ku baldar bin.

Li navçeyên Xelfetî, Hewag, Serêkaniyê û Sirûcê yên Rihayê jî, doh bi şev piştî barana zêde lehî rabû û hinek mal û erdên xelkê di bin avê de man.