Li ser sosyal medyayê, roja 5ê Sibata 2023ê dîmenên ku 3 polîs li ciwanekî didin hat belavkirin. Hat îdiakirin, dîmen 25ê Çileya 2023ê li Kolana Vali Ozan a navçeya Artuklu ya Mêrdînê hatine kişandin.

Di dîmenan de diyar dibe ku 3 polîs li ser serê ciwanekî kom bûne û bi dest û pêyan lê didin.

Lê nehat zanîn navê wî ciwanî çiye û polîs ji ber çi lê didin.

Heta niha derbarê bûyerê de Rêveberiya Ewlekariya Mêrdînê daxuyanî nedaye.

Parzêgariya Mêrdînê: Lêpirsîn hat destpêkirin

Piştî belavbûna dîmenên tundiya polîsan li beramber ciwanekî ku tê gotin, li navçeya Artukluyê bûye, Parêzgariya Mêrdînê daxuyaniyek belav kir û ragihand, têkildarî bûyerê lêpirsîn hatiye destpêkirin.

Di daxuyaniya Parêzgariya Mêrdînê de tê gotin: “Têkildarî dîmenên vîdyoyî ku li ser hin hesabên medyayên civakî û saziyên çapemeniyê yên derbarê bûyera hin polîsên li Kolana Vali Ozan a navçeya Artukluyê hatin weşandin; derbarê mijarê de lêpirsîna edlî û îdarî hatiye destpêkirin.”