Wekîlê Mîrê Êzdiyan ragehand, îsal ji bo Cejna Cema tê pêşbînî kirin ku 200 hezar ziyaretkar serdana perestgeha Laleşê bikin û her naha amadekarî ji bo Cejna Cema destpê kirine û çend rênmayî ji bo bêhtir rêxistin kirina Cejna Cema hatine derxistin.

Wekîlê Mîrê Êzdiyan Cewher Elî Beg ji BasNewsê re ragehand: ‘’Îsal ji bo Cejna Cema çend rênmayiyekî nû hatine derxistin, ew jî wisa ne; Ew kesê serdana perestgeha Laleşê dikin divê cilûbergên wan guncaw û maqûl bin û nabe çek bikar bê. Divê paqijiya perestgeha Laleşê bê parastin û nabe amûrên mûzîkê bikarbên. Xala herî giring jî ew kesên serdana Perestgeha Laleş bikin pêlavên xwe daynin.’’

Herwaha diyar kir: ‘’Xelkê Êzdî li hemû welatan ve serdana Perestgeha Laleşê dikin, ku beşdarî merasîmên Cejna Cema bikin û îsal jî pêşbînî tê kirin ku bêhtirî 200 hezar ziyaretkar serdana Perestgeha Laleşê bikin.’’