Li gor zanyariyên peyamnêrê K24ê li Kerkûkê, îro yekşemê 3ê Îlonê zêdetirî 40 ciwanên Kurd li bajarê Kerkûkê ji aliyê hêzên Dijeteror û ewlehiyê yên Iraqê ve hatine girtin.

Bavê girtiyekî ji K24ê re ragihand, kurê wî yek ji wan xortên Kurd e ku bi tawana terorê hatiye girtin û eger e bi wê tohmeta bo dadgehê bê veguhastin. Herwiha got, ew nizanin ciwanên hatine girtin li kû ne û heta niha ti kesî pêwendî bi wan re nekiriye.

Got jî: Girûpek xelkê bi hevkariya hêzên ewlehiyê rêya Kerkûk – Hewlêrê girtin û dema welatiyan xwepêşandan bo vekirina rê kirin, bi tundî bersiva wan hat dayîn.

Piştî aloziyên şeva borî, hejmareke mezin ji hêzên ewlehiyê ji i Dije-Teror, artêşa Iraqê û grûpên Heşdî Şeibî pêk tên, li taxên Kurdan bicih bûne û dest bi lêgerîn û girtina ciwanên Kurd ên beşdarî xwepêşandanê bûne, kirine.

Duhî şemiyê 02.09.2023 demjimêr 17:00 hejmarek ji ciwanên Kurd ên xelkê Kerkûkê li dijî girtina rêya sereke ya Hewlêr – Kerkûkê ji aliyê beşek ji Ereb û Tirkmenên Kerkûkê ve, dest bi xwepêşandanê kirin. Xwepêşandan jî bû sedema aloziyê û hêzên ewlehiyê bi guleyan destêwerdana xwepêşandanê kirin.

Di wê xwepêşandanê de 4 welatiyên Kurd yên bi navên (Hawkar Ebdullah, Heval Star, Semed Mihemed û Husên Sabîr) hatin şehîdkirin û 15 welatiyên din jî birîndar bûn.

Ji bilî şehîdbûn û birîndarbûna hejmarek welatiyên Kurd li Kerkûkê, 4 rojnamevan û xebatkarên ragehandinê jî ji aliyê hêzên ewlehiya Kerkûkê ve hatin girtin û yek jî birîndar bû.