Fermangeha Medya û Zanyarî ya Hikûmeta Herêma Kurdistanê di daxuyaniyekê de ragihand, dirustkirina pênc hewzan li ser rûbarê Xabûrê yê Zaxoyê, tevî ku dê dîmena ciwan bide bajêr û derdora wê, asta avê jî dê ji metreyekê bo du metre û nv bilind bike û sektora geştyariyê vejîne.

Li gor daxuyaniya Fermangeha Medya û Zanyarî, ji bo ku ew hewz di dema diyarkirî de werin çêkirin û xebatên wê bileztir birêve biçin, çar kompaniyên cuda erkê çêkirina wan li xwe girtine û bi her çar kompaniyan, nêzîkî 200 karker û karmend bi zêdetirî 20 makîneyan ve, şev û roj heta 20 demjimêran dixebitin ku zêdetirî %75ê wan karker û karmendan, xelkê deverê ne.

Dirêjahiya rûbarê Xabûrê 160 kîlometre ye û di 47 gundên sînorê îdareya serbixwe ya Zaxoyê re derbas dibe.

Ji ber hişkesaliyê, asta ava rûbarê Xabûrê bi awayekî berçav daketiye, ji ber vê yekê bi temambûna wan hewzan, xelk û navçe ji kêmavî û hişkesaliyê dê rizgar bibin.

Fermangeha Medya û Zanyarî behsa wê yekê kir ku di Kabîneya Nehem a Hikûmeta Herêma Kurdistanê de Zaxo bûye îdareyeke serbixwe û niha çendîn projeyên mezin tê de têne encamdan ku dê bibin sedema vejîna Zaxoyê û ciwantirbûna bajêr wek dirustkirina pênc hewzan li ser rûbarê Xabûrê û kesktirkirina bajêr û çêkirina parkên mezin û mûzexane û qîrkirina cade û rêyan û berfirehkirin û modernkirina durêyên sereke yên bajêr.