Êvara duh Sêşemê 3ê Çileya 2023an, kameramanê Tora Medyayî ya Rûdawê yê li devera Germiyanê ya ser bi Silêmaniyê ve Mihemed Xelîl jiyana xwe ji dest da.

Pismamê wî, Araz Mihemed ji Rûdawê re got, Mihemed Xelîl dema bi komek hevalên xwe re futbol dilîst, ji nişkê ve nexweş ket û piştî rakirin nexweşxaneyê jiyana xwe ji dest da.

Araz Mihemed got, “Êvara Sêşemê Mihemed bi hevalên xwe re futbol lîstiye, piştî ku ji yarîgehê derketine ji nişkê ve ketiye erdê û rakirine nexweşxaneyê, lê li wê derê canê xwe ji dest daye.”

Mihemed Xelîl ji sala 2018an ve di Tora Medyayî ya Rûdawê de wek kameraman dixebitî, ew zewicî bû û du zarokên wî hene.

Dîrektorê Tora Peyamnêran a Rûdawê Rêbaz Elî sersaxî ji malbata Mihemed Xelîl re xwest û got, “Ew kameramanekî jêhatî û baş bû. Di dema erka xwe de karên girîng di Rûdawê de pêk anîn û erkên xwe yên medyayî bi cih anîn. Em dê wî her tim bi rêzdarî bi bîr bînin.”