Li navçeya Xaneqîna Başûrê Kurdistanê termê jinekê hate dîtin, ku bi prîketê (bilok) hatibû kuştin. Rêveberiya Polîsên Xaneqînê jî dibêje, dibe jina kuştî û kujerên wê ji derveyî bajêr hatibin.
Derengiya şeva 6ê Sibata 2017ê li nav avahiyekê nû çêkirî de termê jinekê hate dîtin .
Derbarê mijarê de Rêveberê Polîsên Baregaha Azadî ya Xaneqînê Eşref Mihemed ragihand; “Li taxa Bextiyarî termê jinekê 20-25 salî hate dîtin. Eşkere ye ku ev jin bi blok (prîket) hatiye kuştin.”
Mihemed daxuyand, ku lêkolîna derbarê mijarê de berdewam dike lê heta niha nasnameya vê jinê û bikujên wê nehatiye zelalkirin.
Rêveberê Tûndûtîjiya Germiyanê Lemia Mihemed jî got, ku heta niha derbarê wendabûna jinan de li Germiyan û Xaneqînê ti gilî nehatine tomarkirin, lewma dibe ev jin ji derve hatibe Xaneqînê.
Termê jina hatiye kuştin şandine pizîşka dadwerî
Ji destpêka sala 2017ê de ev duyemîn bûyera kuştina jinan e li nav sînorên rêveberiya Germiyanê.
