Serokê Partiya Sosyalîst Demokrata Kurdistanê (PSDK) Mihemed Hacî Mehmûd li ser biryarên Dadgeha Federal a Iraqê got, “Tevî gelek peyam û daxuyaniyên me yên di dema borî de derbarê biryar û pêşniyarên nedestûrî yên bi navê Dadgeha Federalî li dijî gelê Kurdistanê û pêkhateya siyasî ya herêmê, ku bê guman pişta wê stûr bûye bi têgihîştina me ya ji kûrahiya rayedarên Bexdayê.”

Mihemed Hacî Mehmûd anî ziman, “Ji ber vê yekê ez bang li Kurdan dikim ku êdî xwe, neteweya Kurd û pêkhateya siyasî ya Herêma Kurdistanê nedin dest qederê, dadgeheke Erebî çend biryarên nerewa dane, wek mîrateya Kurdan be, ez dibêjim divê Kurd ji Bexdayê vekişe û ti peywendiyek di navbera Kurdan û Bexdayê de nemîne, ti nûnertiya Iraqê jî li Kurdistanê nemîne.”

Mihemed Hacî Mehmûd herwiha got, “Iraq pêwîstiya wê bi dadgeheke destûrî heye û dadgeha ku di dema destûra demkî ya Iraqê de hatiye avakirin, biryarên siyasî ne û ti rewatiya wê nîne.”

Dadgeha Bilind a Federal a Iraqê îro Çarşemê 25ê Çileya 2023an li ser giliya parlamenterê serbixwe û endamê Komîteya Darayî ya Parlamentoya Iraqê Mistefa Senad û Parêzgarê Wasitê Mihemed Meyahî ya derbarê şandina mûçeyên karmendên Herêma Kurdistanê civiya.

Her du kesên ku gilî tomar kirine daxwaza betalkirina biryarên jimare 8 ya sala 2022 û jimare (401, 257, 226, 194 ya sala 2021) yên Encûmena Wezîrên Iraqê dikin ku piştevaniya şandina 200 milyar dînar bo Herêma Kurdistanê kirine.

Doza bi jimareya 170/Federal/2022, berê sê caran hatibû taloqkirin, cara dawî di 18ê vê mehê de û Dadgeha Federal îro dîsa li ser civiya.

Send di vîdyoyekê ji nav Dadgeha Bilind a Federal a Iraqê de dibêje, “Dadgeha Bilind a Federal a Iraqê hemû biryarên encûmena wezîrên Iraqê yên li ser şandina pereyan ji bo Herêma Kurdistanê betal kir, ku li dijî yasa û destûrê ye.”