Serokê Herêma Kurdistanê Nêçîrvan Barzanî duh çû Bexdaya paytexta Îraqê.

Nêçîrvan Barzanî di destpêkê de bi Serokê Dadgeha Bilind a Federal a Îraqê Casim Mihemed Ebûd civiya.

Serokatiya Herêma Kurdistanê li ser civînê daxuyaniyek belav kir.

Li gorî daxuyaniyê Nêçîrvan Barzanî û Casim Mihemed Ebûd li ser destûr, parastina aştî û aramiyê û berjewendiyên bilind ên welêt axivîn.

Herwiha di daxuyaniyê de hat ragihandin ku her du aliyan çend mijarên li ser rewşa giştî ya Îraqê gotûbêj kirine.

Serokê Herêma Kurdistanê Nêçîrvan Barzanî piştre bi Serokê Encumena Bilind a Dadwerî ya Îraqê Fayeq Zêdan re hevdîtinek kir.

Di hevdîtnê de Fayeq Zêdan ji ber hewlên wî yên ji bo çareserkirina pirsgirêkên welêt pesênê Nêçîrvan Barzanî da.

Herwiha di hevdîtinê de serdana Nêçîrvan Barzanî ya Tehranê û naveroka hevdîtinên wî yên bi rayedarên Îranê re hat gotûbêjkirin.

Li aliyê din peywendiyên Hewlêr-Bexdayê û çareserkirina pirsgirêka di navbera wan de hatin gotûbêjkirin.

Nêçîrvan Barzanî herî dawî 27ê Nîsanê çûbû Bexdayê û bi serkirdeyên Îraqê re civiyabû.

Berdevkê Serokatiya Herêma Kurdistanê Dilşad Şehab ragihand ku di civîna Nêçîrvan Barzanî û Sûdanî de dê mijarên hevbeş bên gotûbêjkirin.