Serokê Herêma Kurdistanê Nêçîrvan Barzanî bi boneya hatina serê sala nû ya zayinî peyamek belav kir û tê de dibêje: “Em dê ji bo baştirkirina jiyan û jiyana welatiyan, ji bo zêdetir kûrkirina pirdengiyê, pêkvejiyan, tolerans, parastina demokrasî, mafên mirovan, wekhevî û azadiyan bixebitin.”
Barzanî tekez dike ku ew dê bi welatên cîran, herêmî, dost û hevpeymanên navneteweyî re li ser esasê rêzgirtin û berjewendiyên hevpar têkiliyên xwe pêş bixin.
Peyama Serokê Herêma Kurdistanê Nêçîrvan Barzanî wiha ye:
“Sala nû ya zayînî li malbatên şehîdan, pêşmergeyên qehreman û hêzên ewlehiyê, li hemû gelê Kurdistan, Iraq û cîhanê pîroz dikim. Hêvîdar im ku sala bidestveanîna hêvî û serkeftinê û bidawîbûna şer, alozî, xem û nexweşiyan be û aştî, ewlehî û aramî li tevahiya mirovahiyê belav bibe.
Divê berjewendiya gelê Kurdistanê bibe armanca sereke ya me hemûyan, daku bidestpêkirina sala nû re, em yekrêzî, pêkvejiyan, hevpejirandin û hevkariyên hevbeş bikin rûpelekî nû di peywendiyên di navbera hêz û aliyên siyasî û hemû pêkhateyên Herêma Kurdistanê de. Werin em bi hev re kar bikin ji bo parastin û misogerkirina mafên destûrî û federalî û çareserkirina pirsgirêkan ligel Hikûmeta Federal a Iraqê li ser bingeha destûrê.
Em careka din tekez dikin ku Herêma Kurdistanê erk û berpirsiyariya xwe ya hevbeş cîbicî dike û weke hertim faktora aramî û seqamgîriyê dibe, ji bo hemû hevkariyekê jî berhev e ji bona rûbirûbûna gef û çareserkirina pirsgirêkên welat, ji bona bidestveanîna aramî û seqamgîriya siyasî û emnî li Iraqê, bi awayekî ku maf û şayesteyên hemû pêkhateyên welatiyan parastî bin.
Em dê bi welatên cîran, herêmî, dost û hevpeymanên navneteweyî re li ser esasê rêzgirtin û berjewendiyên hevpar têkiliyên xwe pêş bixin. Ji bo rûbirûbûna metirsiya terorê û jinavbirina terorîstan em dê li ser hevkariya hevbeş berdewam bin. Em dê bi hev re ji bo aştî, aramî û îstiqrarê biçespînin.
Em dê ji bo baştirkirina jiyan û jiyana welatiyan, ji bo zêdetir kûrkirina pirdengiyê, pêkvejiyan, tolerans, parastina demokrasî, mafên mirovan, wekhevî û azadiyan bixebitin. Em bi hêvî û geşbîniyê ve li sala nû dinêrin. Ji bo we hemûyan tendirustiyeke baş, serkeftin, şadî û bextewariyê dixwazim.
