Serokê Herêma Kurdistanê Nêçîrvan Barzanî di merasima derçûna qonaxa çaremîn a perwerdeya efserî ya li Koleja Leşkerî ya Qelaçolan de ragihand: “Îro rojeke taybet e ji bo Herêma Kurdistanê û Iraqê, ku em berhema hewlên mezin ên derçû û mamostayan dibînin. Ez gelek dilxweş im ku dibînim ku 769 ciwanên welatê me ji vê zanîngeha jêhatî bi hêz û karînên nû, bi zanist û dîsplîna leşkerî derdiçin.”

Herwiha got: “Tiştê xweşbîn ew e ku 48 kes ji van derçûyan, jin in û piştî 9 mehan xwendin û perwerdeyê, dê bi pileya serbazî Milazim derbiçin û xwîneke nû bidin Hêzên Pêşmergeyên Kurdistanê.”

Serokê Herêma Kurdistanê got jî: “Daxwaza we ya tevlîbûna koleja leşkerî piştî qedandina zanîngehê, nîşana dilsoziya we û hesta kûr a berpirsiyariya neteweyî ye.”

Herwiha got: “Di dirêjahiya dîroka têkoşîna gelê me de, jinên Kurd îsbat kirine ku di avakirina welat û parastina xaka welat de, hevparê sereke û bi bandor in.”

Nêçîrvan Barzanî tekezî li ser wê yekê kir, “Pêşmerge ji roja damezrandina xwe ve, her tim bûye mertalek bihêz bo parastina Kurdistanê û destkeftên wê.”

Got jî: “Em li Herêma Kurdistanê di wê baweriyê de ne ku divê Pêşmerge û hêzên me yên çekdar, pêwîst re di saziyeke serbixwe û neteweyî û pîşeyî de bin. Herwiha divê ji her cure nakokiyên siyasî û partîtî dûr bin. Ev hêz girêdayî welat û gelê Kurdistanê bi hemû pêkhateyên cuda yên Kurdistanê bin.”

Nêçîrvan Barzanî got amaje bi wê kir: “Pêşmerge beşeke giring a sîstema berevaniya Iraqê ye, ji ber wê jî erkê Iraqê ye ku bi her awayî piştevaniya bihêzkirina Pêşmerge bike.”

Herwiha got: “Em bi cidî kar dikin bo bihêzkirina karîn û şiyanên Pêşmerge, da ku bi baştirîn şêwe rûbirûyê kêşeyan bibin.”

Serokê Herêma Kurdistanê got: “Pêşmergeyên qehreman ên Kurdistanê û hêzên me îspat kirin ku di şerê li dijî terorîstan û DAIŞê de, di asta berpirsyarî û dîrokî de bûn.”

Herwiha got: “Em tekezî li ser berdewamî, hemahengî û hevkariya hevbeş di navbera Pêşmerge, artêşa Iraqê û hêzên hevpeymanan de dikin. Em spasiya hêzên hevpeymanan dikin ji bo çaksazî û yekxistina Pêşmerge di bin sîwana Wezareta Pêşmerge ya Hikûmeta Herêma Kurdistanê de, da ku bibin hêzeke niştimanî û destkeftên Herêma Kurdistanê biparêzin.”