Wezîrê Berevaniyê yê Amerîkayê Lloyd Austin di nameya xwe de li ser serdana xwe ya bo Hewlêrê dibêje: “Ez kêfxweş bûm ku careke din tekezî li ser hêz û girîngiya hevbeşiya di navbera Amerîka û Herêma Kurdistanê li Iraqê bikim.”

Li gor daxuyaniya Serokatiya Herêma Kurdistanê di nameya xwe ya bo Nêçîrvan Barzanî de, Austin tevî îşaretdana bi pêzanîn û gotûbêjên derbarê pêdagiriya hevbeş a her du aliyan bi yekcarî têkşikandina DAIŞê, tekîd li wê yekê kiriye ku hevkariya berdewam Amerîka û Herêma Kurdistanê ligel Bexdayê ji bo Iraqeke aram û seqamgîr û xwedî serwerî pêwîst e.

Austin herwiha rola Nêçîrvan Barzanî di rêvebirina prosesa rêkxistin û çaksaziyên Wezareta Pêşmerge li ser bingehê peymana li hevtêgihiştina hevbeş a Pentagonê ligel Wezareta Pêşmerge ya Hikûmeta Herêma Kurdistanê bilind nirxand. Xwesteka welatê xwe jî ya ji bo berdewamiya karê hevbeş digel Herêma Kurdistanê nîşan da.