Serokê Herêma Kurdistanê Nêçîrvan Barzanî û Heyeta Îmraliyê îro li Hewlêrê li hev civiyan.

“Em hêvîdar in PKK bi awayekî stratejîk li pêvajoyê binêre”

Li gorî daxuyaniya Serokatiya Herêma Kurdistanê, Nêçîrvan Barzanî ji şandeyê re gotiye:

"Em hêvîdar in PKK bi awayekî stratejîk li pêvajoyê binêre û divê ev derfet ji dest neçe.

Me her tim hewl daye ku pêvajoya aştiyê pêk were û pirsgirêk bi awayekî aştiyane çareser bibin, ji ber ku tecrubeyê nîşan daye şer û çek ti pirsgirêkan çareser nakin."

“Pêvajo derfeteke girîng û dîrokî ye”

Nêçîrvan Barzanî hemû hevkarî û piştgiriya xwe ji bo serkeftina “pêvajoya aştiyê” ya li Tirkiye û Bakurê Kurdistanê ducare kiriye û aniye zimên:

"Pêvajo derfeteke girîng û dîrokî ye û pêwîst e hemû kes ji bo serkeftina pêvajoyê û biratiya Kurd û Tirkan bixebite çimkî aştî ji bo hemû kesên li Tirkiyeyê û herêmê pêwîst e."

Heyeta Îmraliyê jî silav û rêzên taybet ên Abdullah Ocalan gihandine Nêçîrvan Barzanî û qala gavên pêvajoyê hatiye kirin.

Heyeta Îmraliyê pesnê “hewlên Serok Nêçîrvan Barzanî yên di pêvajoya aştiyê ya berê û niha de” daye û xwestiye ku ew piştgiriya xwe bidomîne.

Şandeya DEM Partiyê ya Îmraliyê piştî hevdîtinên xwe yên bi Abdullah Ocalan re serdanên xwe didomîne.

Heyeta Îmraliyê di çarçoveya van hevdîtinan de hat Başûrê Kurdistanê.

Heyet doh bi Serok Mesûd Barzanî re civiyabû û îro jî bi Serokê Herêma Kurdistanê Nêçîrvan Barzanî re civiya.

Heyet dê sibe jî here Silêmaniyê û bi Serokê Yekîtiya Niştimanî ya Kurdistanê (YNK) Bafil Talebanî, Cîgirê Serokwezîr Qubad Talebanî û rayedarên YNKyê re bicive.

Heyet ji Pervîn Buldan û Sirri Sureyya Onder, Hevserokê DBPyê Keskîn Bayindir, endamên Buroya Hiqûqê ya Sedsalê Ozgur Erol û Îbrahîm Bilmez, Hevberdevkê Komîsyona Pêwendiyên Derve ya DEM Partiyê Berdan Ozturk û parlamenterên DEM Partiyê Gulcan Kaçmaz Sayyîgît û Mehmet Kamaç pêk tê.