Wan komîteyên ku Parlamentoya Kurdistanê raspardibûn bo lêkolînkirina ziyanên şerê artêşa Tirkiyê û PKKê li navçeyên sînorî yên Herêma Kurdistanê, raporta xwe temam kirin û li gor wê raportê, Tirkiye bi kurahiya 15 kîlometre xaka Başûrê Kurdistanê derbas kiriye û zêdetir ji 500 gund jî ji tirsa şer hatine valakirin.
Parlamentoya Kurdistanê roja 29ê Hezîrana îsal, hejmareke komîteyan ji bo lêkolînkirina rewşa navçeyên sînorî yên Hewlêr, Duhok, Silêmanî û diyarkirina ziyanên bombebaran û topbaranên Tirkiye û Îranê, raspardibûn.
Ew komîte jî çûne navçeyên ciyawaz ên sînorî yên Hewlêr, Silêmanî, Helebçe, Duhok û Şingalê û lêkolîn birêve birin û raportek amade kirin.
Li gor wê raporta ku komîteyan amade kirine û taybet bo Rûdawê hatiye şandin, ji wê dema ku Tirkiyê di naverasta meha Hezîranê de li sînorê Başûrê Kurdistanê dabûn destpêkirin, 504 gund hatine valakirin û di heyama 28 salên şerê Tirkiye û PKKê de jî 50 hemwelatiyên sivîl şehîd bûne.
Raporta komîteyan li gor parêzgehan bi vî rengî ye;
Li parêzgeha Hewlêrê:
-Ji 73 gundên ser sînor 55 gund hatine valakirin
-Bi dehan milyon dolar ziyana şewatên rez û baxan bûye
-104 gundên Soran û Sîdekanê hatine valakirin
-15 gundên sînorê Çomanê hatine valakirin
-Gundên Zargelî û Bokrîskan li Wertê hatine valakirin
-Îranê astengî ji bo hatinçûna xelkê wan gundan çê kiriye
Li parêzgeha Silêmanî:
-Êrişa Kunemasî di 25ê Hezîranê de bûye sedema birîndarbûna 7 kes û 25 milyon dînar ziyana maddî
-Ziyana xizmetguzariya giştî li ser elektîrîk û rêyan hebûye
Îdareya Raperîn:
-Derbaskirina sînor ji aliyê Îranê ve li Kêlê û Casûsan
-Binpêkirina rêkeftina sala 1975
Qezaya Mawet:
-Wêranbûna binkeya tendirustî ya gundê Sefrê
-Ziyana hêla sereke ya elektîrîkê ya wî gundî
-Rûxana piraniya xaniyên wî gundî
Parêzgeha Duhokê:
Zaxo:
-Derbaskirina sînor bi firehiya 40 kîlometre û kurahiya 15 kîlometre ji aliyê Tirkiyê ve
-666 top û 70 mûşek arasteyî gundan hatine kirin
-Di 28 salan de 50 kes hatine kuştin û bi dehan kes jî birîndar bûne
-18 bargehên Tirkiyê li sînorê gundên Zaxo hatine danîn
-25 gundên bajarokê Derkar hatine topbarankirin
-200 cotkar nikarin vegerin navçeyên xwe
-13 gundên Batîfa hatine bombebarankirin û 27 gund hatine valakirin
-Bi giştî 400 malbat ziyanmend bûne
Amêdî:
-Valakirina 198 gundan ji 348 gundên wê qezayê
-4 kesên sivîl şehîd bûne û 28 kes jî birîndar
-%80 ji gundên Çemankê hatine valakirin
-6 gundên Kanî Masê û Berwarî hatine valakirin
-Koçberbûna zêdetir ji 2500 malbatan
-Valakirina 85 gundan ji 92 gundên Şeladizê
-Valakirina 42 gundên Dêrelûkê ji 56 gundan
-Valakirina 24 gundên Dînartê ji 91 gundan
-Di 24 salan de 9 kes hatine kuştin û 21 kes birîndar bûne
Parêzgeha Helebçê:
-Astengiya Îranê li ber cotkarên Hewramanê
-Qirêjbûna çavkaniyên avên navçeyê
Komîteyan hejmarek pêşniyaz jî pêşkêşî Parlamentoya Kurdistanê kirin, ji wan jî:
-Hemahengiya Iraq û Herêma Kurdistanê bo parastina sînor
-Raspardina hikûmetê ji bo lihevtêgihiştina siyasî li gel hêzên perçeyên din ên Kurdisanê
-Zêdekirina Hêza Parastina Sînor (yên kurdîaxêv)
-Raspardina hikûmetê ji bo danûstandina qerebûkirina ziyandîtiyan
