Serokê Herêma Kurdistanê Nêçîrvan Barzanî, Balyozê Fransayê yê Îraqê Patrick Durell qebûl kir.

Serokatiya Herêma Kurdistanê da zanîn ku di civînê de mijarê wekî “pêwendiyên Fransayê yên bi Îraq û Herêma Kurdistanê re, pêwendiyên Hewlêr û Bexdayê, çareserkirina pirsgirêkên Hewlêr û Bexdayê û hilbijartinên Parlamentoya Kurdistanê” hatine nirxandin.

Li gorî daxuyaniyê, “Her du alî hevra bûn ku firset heye pêwendiyên Fransayê yên bi Îraq û Herêma Kurdistanê re bi taybetî jî pêwendiyên aborî û bazirganiyê bi pêş bikevin.”

“Hilbijartin gelekî girîng in”

Patrick Durell daye zanîn, “Ev hilbijartin ji bo Herêma Kurdistanê gelekî girîng” in û hêvî kiriye, “Bila dema propagandayê aram û pêvajoya dengdanê jî serkeftî be.”

Her wiha “rûdanên dawiyê yên li herêmê” jî mijareke din a civîna Barzanî û Durell bû.

Hilbijartinên dewreya 6an ên Parlamentoya Kurdistanê dê 20ê Çiriya Pêşîn bên kirin.

Propagandaya hilbijartinan doh (25ê Îlonê) dest pê kir û dê heta 15ê Çiriya Pêşîn berdewam bike.