Di hevdîtinê de, Balyozê Vatîkanê bi navê dewleta Vatîkanê bi tundî êrîşa komara Îslamî ya Îranê li ser navçeyên cuda yên Herêma Kurdistanê şermezar kir û sersaxî li Serok Barzanî û gelê Kurdistanê kir ji bo qurbaniyên êrîş û bombebaranê.

Balyozê Vatîkanê yê li Iraqê pêzanînên xwe ji bo pêgeh û rola Serok Barzanî ya di xebata gelê Kurdistanê û pêkanîna aştiyê de nîşan da û herwiha tevî nîşandana pêzanînên xwe ji bo kultûra pêkvejiyanê ya gelê Kurdistanê, spasiya gelê Kurdistanê jî kir ku di rojên dijwar de hembêza xwe ji bo bi sed hezaran aware û penaberên ji pêkhateyên cuda cuda re, bi taybetî ji bo Krîstiyanan vekiriye.

Di hevdîtinê de Serok Barzanî bal kişand ser kûrahiya ferhenga pêkvejiyanê ya li nav gelê Kurdistanê û tekez jî kir ku gelê Kurdistanê di pêşvebirina vê ferhengê de berdewam dibe û eger çend dengên ji bo dijayetiya pêkvejiyanê hebin jî, ew deng ji aliyê gelê Kurdistanê ve nayên pesendkirin.

Herwiha di hevdîtinê de derbarê rewşa siyasî ya Iraqê de danûstandina fikr û ramanan hat kriin û Serok Barzanî tekez kir ku divê kêşeyên Iraqê li ser bingeha gotûbêj û destûrê werin çareserkirin.

Di dawiya civînê de Balyozê Vatîkanê spasiya gelê Kurdistanê û saziyên Herêma Kurdistanê kir ji bo pêşwazî û mazûvaniya cenabê Papa û bi vê boneyê diyareke taybet pêşkêşî Serok Barzanî kir.