Li gor daxuyaniya Baregeha Barzanî, di civînê de ku Konsulê berê yê Amerîkayê li Hewlêrê Mark Straw amade bû, Serok Barzanî bi xêrhatina Konsulê nû yê Amerîkayê kir û hêviya serkeftinê jê re xwest û rola Konsulê berê yê Amerîkayê di pêşxistina têkeliyên di navbera Herêma Kurdistanê û Amerîkayê de bilind nirxand.

Di hevdîtinê de, Serok Barzanî spasiya gel û hikûmeta Amerîkayê kir ku di qonaxên curbicur de piştgîriya gelê Kurdistanê kirine, bi taybetî di warê damezirandina devera dijefirînê bo Kurdistanê piştî raperîna gelê Kurdistanê li sala 1991ê û rûxandina rejîma berê ya Îraqê di sala 2003an de û herwiha alîkariya Herêma Kurdistanê Iraqê di şerê dijî terorê de.

Di beşeke din a vê hevdîtinê de, guftûgo li ser hilbijartinên dahatû yên Herêma Kurdistanê, serdana dawî ya Serok Barzanî bo Bexdayê, peywendiyên Herêma Kurdistanê û Hikûmeta Iraqa Federal û rewşa siyasî ya Iraq û navçeyê, hatin kirin.