Di konfranseke çapemeniyê de, îro Çarşemî 28ê Adara 2018ê, Serokwezîrê Herêma Kurdistanê, Nêçîrvan Barzanî li ser guhertinên di sîstema mûçeyên fermanberan de û herwiha çend mijarên rojevê daxuyanî da.

Nêçîrva Barzanî da xuyakirin, ku wan derbarê mûçeyên fermanberan de biryarên baş û giring di berjewendiya fermanberan de daye û diyar kir, ew ji rakirina yekcarî ya sîstema paşekewta mûçeyan nêzîk bûne.

Barzanî derbarê geşedanên têkildarî hebûna PKKê li nav axa Iraqê û daxuyaniyên rayedarên Tirkiyê yên derbarê pêkanîna operasyonên serbazî de jî got: “Em bi ti awayî qebûl nakin ku ti hêzek ji axa Herêma Kurdistanê ve êrişî welatên cîran, çi Tirkiye be, çi Îran be yan jî Sûriye, bike.”

Serokwezîrê Herêma Kurdistanê tekez kir: “Bi ti awayî lojîkî nîne, ku hêzek ji nav axa Herêma Kurdistanê biçe û li Tirkiyê êrişan bike û careke din vegere Herêma Kurdistanê, ev yek nayê qebûlkirin.”

Derbarê derketina aloziyên li Herêma Kurdistanê û helwesta Hikûmeta Herêma Kurdistanê li ser wan aloziyan jî, Nêçîrvan Barzanî ragihand: “Her karek ku ji bo parastina welatê me ji tundî û aloziyan pêwîst be, emê bikin.”