Wezîrê Pêşmerge yê Herêma Kurdistanê Şorş Îsmaîl duh duşemê pêşwaziya Kolonel Evans Atêşa Leşkerî li Balyozxaneya Amerîka li Iraqê û Kolonel Sanborn Berpirsê Ofîsa Hevkariya Leşkerî li Konsulxaneya Giştî ya Amerîka li Hewlêrê kir.

Di hevdîtinê de her du alî behsa rêkeftina di navbera Wezareta Pêşmerge û Wezareta Berevaniya Amerîkayê de kirin û her du alî li ser cîbicîkirina xalên rojeva rêkeftina di navbera Wezareta Pêşmerge û Wezareta Berevaniya Amerîkayê de li hev kirin.

Herwiha Wezîrê Pêşmerge gotiye: ‘’Em spasiya gel, hikûmet û şêwirmendên leşkerî yên Amerîkayê dikin ku di proseya çaksaziyê û avakirina hêzeke leşkerî ya bihêz a modern de piştevaniya Wezareta Pêşmerge kirine.’’

Li beşekî dinê hevdîtinê de Wezîrê Pêşmerge behsa giringiya peywendiyên xwe yên li gel Wezareta Berevaniya Iraqê kir û ragihand ku hewlên wan ligel Wezareta Berevaniya Iraqê û hemû hêzên din ên ewlehiyê yên Iraqê li ser şer û şikandina terorîstên DAIŞê berdewam in.

Ji aliyê xwe ve Kolonel Evans pêngavên Wezareta Pêşmerge ya di warê birêxistinkirina hêz û pêngavên proseya çaksaziyê de û qehremanî û mêrxasiya Pêşmerge di şerê li dijî terorîstên DAIŞê û parastina aramî û asayîşa navçeyê de bilind nirxand.