Odeya Operasyonên Karesatê ya Encûmena Xwecihî ya Cindirêsê ragihand, li bajêr ku 115 hezar kes lê dijîn, ji encama erdhejê rewşa mirovî gelekî aloz bûye û hejmara kesên ku di erdhejê de canê xwe ji dest dane gihîşt 1012 kesan

Li gorî amarên Odeya Operasyonan, heta niha:

- 1012 kesan di erdhejê de canê xwe ji dest dane

- 278 avahî bi temamî hilweşiyane

- 1100 xanî ziyan dîtine

- 1391 malbat bê cih û war mane

- 1816 malbat di kampan de hatine bicihkirin

- 20 kampên nû hatine avakirin

Odeya Operasyonên diyar kir jî ku niha pêwîstiya wan bi van karan heye:

- Dabînkirina konan ji xelkê re

- Belavkirina alîkariyên mirovî li ser ziyandîtiyan

- Vekirina rêyan û rakirina kavilan ji bo tîmên rizgarkirinê bi hêsanî tevbigerin

- Karkirina li ser vegerandina jiyana asayî, eliktrîk, ava û binezaziya bajêr

- Dabînkirina navend û xizmetên bijîşkî û avakirina nexweşxaneyeke meydanî

Bajarokê Cindirêsê, navçeyek ji 7 navçeyên Efrînê ye û 20 k.m li başûrê rojavayê bajarê Efrînê dikeve û zêdetir ji 50 hezar kes lê dijîn.

Dezgeha Xêrxwazî ya Barzanî jî roja 10ê Sibatê wek yekem aliyê xêrxwaziyê gihîşt herêma Efrînê û heta niha 2 karwarên alîkariyê li ser xelkê navçeya Cindirêsê û navçeyên din ên ziyan ji erdhejê dîtine belav dike.