Li gor çavkaniyên Rêveberiya Xweser, roja 28ê Adarê li gundê Biyê ser bi navçeya Şêrewe ya Efrînê, çekdarên grûpa Feyleq el-Şam ser bi Tirkiyê welatiyên Kurd ên bi navên Xelîl Ibrahîm Umer (35) û Umer Umer (20) bi hiceta ku beşdarî xwepêşandana Cindirêsê bûne, revandine û heta niha çarenivîsa wan ne diyar e.

Şeva 20ê Adara 2023an şeva Newrozê, 4 welatiyên Kurd li Cindirêsa Efrînê bi destê çekdarên grûpa Ehrar el-Şerqiye ya ser bi Tirkiyê ve hatibûn kuştin, piştre nerazîbûnên berfreh ên navxweyî û navdewletî dijî vê bûyerê çêbûn.

Dagirkirina Efrînê

Artêşa Tirkiyê û grûpên çekdarên ên tundrew ku ser bi opozisyona Sûriyê ve ne û Tirkiye piştevaniya wan dike, roja 20ê Çileya 2018an êrişeke berfireh a bejayî û asmanî bo ser Efrînê dan destpêkirin ku di bin kontrola hêzên Kurdî de bû.

Piştî wê êrişa berfireh a bi her cor çekên giran, bajarê Efrînê roja 18ê Adara 2018an ket destê artêşa Tirkiyê û grûpên çekdar.

Binpêkariyên çekdaran

Di encama êrişên giran û ketina bajêr bo destê çekdaran de, bi sed hezaran xelkê Kurdan mal û warên bicî hiştin û ketin ser rêyên koçberiyê.

Herwiha ji wê roja ku Efrîn ket bin dagirkirina artêşa Tirkiyê û komên çekdar ên opozisyona Sûriyê, binpêkariyên li hember welatiyên Kurd li wê herêmê berdewam in.