Kongreya Niştimanî ya Sûriyeyê dê îro li Şamê dest pê bike.

Kurd wekî take kes hatine vexwendin û ENKS jî bi daxuyaniyekê bilezkirina kongreyê rexne kir û got pêwîst e Kurd di hemû dan û standinan de kevirê bingehîn bin.

ENKSyê amaje bi wê yekê kir ku lidarxistina bilez a konferansê ya bêyî ku beşdariya rasteqîn a hemû pêkhateyan, bi taybetî gelê Kurd, dê nekare pirsgirêkan çareser bike û armancên xwe bi dest bixe.

ENKSyê tekezî li ser wê yekê kir ku ew piştgiriyê dide her hewlek ku bibe derfeta veguhastineke siyasî ya giştgir ku dawî li êşên Sûriyeyiyan bîne û bingehekê deyne ji bo dewleteke demokratîk a nenavendî ya piretnîk, pirayîn û pirçandî.

“Pêwîst Kurd wekî kevirê bingehîn bin”

ENKSyê da zanîn ku paşguhkirina Kurdan binpêkirina mafên hevbeş ên miletê Kurd e û got:

“Pêwîst e gelê Kurd ji bo her dan û standineke rast û ji bo lihevkirina niştimanî wekî kevirê bingehîn be.”

ENKSyê diyar kir ku beşdarên kongereyê nûnertiya pêkhateyên Sûriyeyê nakin û got:

“Şandina vexwandiyan bi awayekî bijartî, takekesî û dûrî pîverên zelal ku garantiya nûnertiyeke hevseng bike, li ser sûda kongreyê pirsên bingehîn derdixe holê.

Dema kurt a amadekirinê bê ku mercên beşdarbûyan li ber çav werin girtin, derfetên serkeftina kongreyê lawaz dike.”

ENKSyê her wiha destnîşan kir ku her diyalogeke niştîmanî ya rasteqîne, bê tevaya pêkhateyên Sûriyê nabe û got:

"Eger çareserkirina mafên rewa yên tevaya pêkhateyan, li ser binemayên zelal neyê gerentîkirin nagihe tu armancan.”

Di dawiya daxuyaniyê de wiha hat goti, "Rewşa xirab a Sûriyeyiyan, pêwîstî bi çareseriyê ya bi rêya pêvajoyeke siyasî ya cidî û giştgir heye.”