Peyamnêra Rûdawê li Rojavayê Kurdistanê, Rengîn Şero ragihand: Îro hêzeke Amerîkayê li bajarokê Silûk ku dikeve rojhilatê Girê Spî hat dîtin.

Bi gotina peyamnêra Rûdawê, ew hêza Amerîkî ji 6 otomobîlên Hummer û otomobîleke Land Cruiser pêk hatiye.

Piştî destpêkirina êrîşa Tirkiyê bo ser Rojavayê Kurdistanê, ev cara yekem e ku hêzeke Amerîkî li nêzîkî cihê şer û bi taybet bajarê Girê Spî tê dîtin.

Bajarokê Silûkê li rojhilatê Girê Spî ye û dikeva navbera Girê Spî û Serê Kaniyê.

Ev yek di demekê de ye, ku artêşa Tirkiyê îro di sêyemîn roja êrîşa li ser Rojavayê Kurdistanê de, topbaran û bombebarana herdu bajarên Girê Spî û Serê Kaniyê dest pê kiriye.

Tirkiyê ji roja Çarşemê ve dest bi êrîşeke berfireh bo ser Rojavayê Kurdistanê kiriye.