Rewangeha Sûrî ya Mafên Mirovan belav kir, Hêzên Tirkiyê yên li baregeha Sulsanê ya li derdora bajarê Mariê li bakurê Helebê bi cih bûne, şeva borî derdora bajarokê Til Rifet û gundê Şêx Îsayê topbaran kirin.

Da zanîn jî, li eniyên temasê yên Marê, Cibrîn, Şêx Îsa şer û pevçûn di navbera her du aliyan de derketin û heta niha ti zanyarî derbarê ziyanan de nehatine zanîn.

Di heman mijarê de, Hêzên rêjîmê bi mûşekan otombîleke leşkerî ya çekdarên ser bi Tirkiyê ve di navbera gundên Kebeşîn û Birc Heyder ên Efrînê de kire armanc. Artêşa Tirkiyê jî bi 15 topan derdora gundê El-Meyassa topbaran kir, bêyî ku ti agahî derbarê ziyanan de bên aşkerekirin.

Zêdetir ji du mehan e Tirkiye gefa destpêkirina operasyoneke leşkerî li ser Til Rifet û Minbicê dixwe û ji wê demê êrîşên artêşa Tirkiyê û grûpên çekdaran ên opozîsyona Sûriyê yên ku Tirkiye piştevaniya wan de, li ser wan her du bajaran zêde bûne.

Bajarokê Til Rifatê 35 kîlometreyan li rojhilatê Efrînê dikeve û mezintirîn bajarokê devera Şehbayê ye û xwedî cihekî stratejî di navbera bajarê Dîlok û Helebê de ye. Til Rifet ji sala 2016an ve di destê HSDê de ye.

Piştî dagîrkirina Efrînê ji aliyê artêşa Tirkiyê û grubên çekdar ên ser bi wê ve, dora 125 hezaran Efrînî li Til Rifet û derdora wê (herêma Şehbayê) bi cih bûne.