Berdevkê Wezareta Koç û Koçberan a Îraqê Elî Ebas ji Tora Medyayî ya Îraqê re da zanîn:

“Heta niha bi 14 karwanan nêzîkî du hezar malbatên Îraqî hatine vegerandin.

Hejmara giştî ya vegerandiyan bûye 8 hezar, dê pêvajoya vegerandinê bidome.”

Li hêla din, heftaya borî jî 159 malbat ji Kampa Holê vegerandibûn Îraqê.

Wezareta Koç û Koçberan a Îraqê kesên ku ji Kampa Holê tên vegerandin li Kampa Cideyê bi cih dike da ku entegreyî civakê bibin.

Kampa Holê

Kampa Holê li parêzgeha Hesekê ya Rojavayê Kurdistanê ye.

55 hezar kes li vê kampê dimînin û piraniya wan jin û zarokên DAIŞiyan in.

Piraniya kesên ku li vê kampê dimînin ji Sûriye û Îraqê ne lê li kampê welatiyên gelek welatên din jî hene ku berê tevî DAIŞê bûne.

Şêwirmendê Ewlehiya Niştimanî ya Îraqê Qasim Erecî gotibû, “Li Kampa Holê 20 hezar Îraqî hene ku temenê wan ji 18 salan biçûktir e.”

Qasim Erecî destnîşan kiribû ku heta niha 7 hezar û 556 Îraqî hatine vegerandin û hezar 230 kes ji wan şandine malên wan.

Kampa Holê di kontrola Hêzên Sûriyeya Demokratîk (HSD) de ye.

Qasim Erecî gotibû, “HSD derveyî kampê kontrol dike, nava kampê di kontrola DAIŞê de ye.”