Li herêma Efrînê ya Rojavayê Kurdistanê ku di bin dagirkeriya Tirkiyê û çekdarên opozisyona Sûriyê de ye, şer û pevçûn di navbera grûpên çekdar de derket.

Çavkaniyên xwecihî li Efrînê belav kirine ku şer û pevçûn di navbera çekdarên grûpa Hemze û çekdarên Eşîra Miwalî li Efrînê de derket û di encamê de çekdarekî firqeya Hemze bi giranî birîndar bûye.

Heman çavkanî didin zanîn ku çekdarên Eşîra Miwalî xalên pişkinînê li derdora Efrîn danîne û çekdarên grûpa Hemze digirin.

Li Efrîna Rojavayê Kurdistanê gelek caran şer di navbera grûpên çekdar de derdikeve li ser nakokiyên wan li ser dizî û proseyên qaçaxçêtiyê û rêyên wê û destdanîna ser malên Kurdan. Li Serê Kaniyê jî gelek caran ev yek çêbûye û çekdar jî li ser vê yekê hatine kuştin.

Artêşa Tirkiyê û grûpên çekdarên ên tundrew ku ser bi opozisyona Sûriyê ve ne û Tirkiye piştevaniya wan dike, roja 20ê Çileya 2018an êrişeke berfireh a bejayî û asmanî bo ser Efrînê dan destpêkirin ku di bin kontrola hêzên Kurdî de bû.

Piştî wê êrişa berfireh a bi her cor çekên giran, bajarê Efrînê roja 18ê Adara 2018an ket destê artêşa Tirkiyê û grûpên çekdar.