Li Hesekê forumeke navdewletî ya li ser Peymana Lozanê hat lidarxistin

Di sedsaliya Peymana Lozanê de ku 24ê Tîrmeha 1923an de hatibû îmzekirin li Heseke ya Rojavayê Kurdistanê forumeke navdewletî hate lidarxistin.
10.07.2023, Pts - 07:41
Li Hesekê forumeke navdewletî ya li ser Peymana Lozanê hat lidarxistin
Nuçe Belav bike

Li Rojavayê Kurdistanê foruma navdewletî li ser Peymana Lozanê hat lidarxistin. Di forumê de ku li bajarê Hesekê yê Rojavayê Kurdistanê du rojan berdewam kir, nêzî 150 kesayetiyên siyasî, mafnas û lêkoler derbarê Rojhilata Navîn de beşdar bûn. Li welatên ewropî jî çalakî ji bo heman sedsaliya peymana Lozanê hatibûn kirin. Dr. Sadedîn Mela, Kordînatorê Komîteya Peymana Lozanê, û Kovan Kinho, endamê foruma navdewletî derbarê Lozanê mêvanên bernameya Çavê Sêyem a radioya Rûdawê derbarê vê mijarê de bûn.

Kordînatorê Komîteya Peymana Lozanê Dr. Sadedîn Mela anî ziman, “Niha tiştên di dest Kurdan de hene jî li Rojava û Başûr Tirkiye êrîşî wan dike.”

Endamê Foruma Navdewletî derbarê Lozanê Kovan Kinho jî got, “Ne tenê wek Rêveberiya Xweser divê em wek partiyên Kurdistanî em bi hev re bixebitin.”

Peymana Lozanê 24ê Tîrmeha 1923an li bajarê Lozanê yê Swîsreyê di navbera Tirkiyê û welatên Hevpeyman weke Brîtanya, Fransa, Îtalya û çend welatên din de hatiye îmzekirin.

Peymana Lozanê, Peymana Sêvrê ku li gorî wê avabûna dewleta Kurdistanê dihate pêşbînîkirin, hilweşand û bû astengiya sereke li pêş serxwebûna Kurdistanê.

Rudaw
Vî nûçeyê tevayî: 397 kes dît.
Rojanekirina Dawî:03:09:05