Partiya Demokrata Kurdistana Îranê (PDKÎ) û Komeleya Şoreşgerên Zehmetkêşên Kurdistana Îranê (Komele) derbarê xwepêşandanên gelên Îranê de daxuyaniyeke hevbeş belav kirin.

PDKÎ û Komele di daxuyaniya xwe de dibêjin: “Gel ji desthilata Îranê bêzar bûye û nerazîbûnên wan êdî destpê kiriye. Em ji bo nerazîtiyên xelkê daxwaza piştîvaniya navdewletî dikin.”

Di daxuyaniyê de hatiye gotin, xwepêşandan nîşana vê yekê ne, ku xelk ji sozên reformxwazên Îranê bê hêvî bûne û êdî nikarin pişta xwe bi baskên cuda yên nava desthilata Komara Îslamî ve girê bidin.

Herdu partiyên Rojhilatê Kurdistanê amaje dikin, ku destpêka xwepêşandanan li bajarên mezin ên Îranê çêbûne û ev yek jî nîşan didin ku hemû neteweyên li Îranê, bi hevre vê desthilatê naxwazin.

PDKÎ û Komeleya Şoreşger dibêjin: “Ji bo gihiştine dadperweriyê, gelê Kurdistanê jî piştgiriyê dida dengê azadîxwazî û xwepêşandanan.”

Hevdem daxwazê ji navendên biryarder ên cîhanî dikin, ku piştîvaniya xelkê Îranê bikin û daxwaza azadkirina zîndaniyên siyasî û girtiyên xwepêşandanan jî dikin.