Rêxistina Mafê Mirovan “Hangaw” li Rojhilatê Kurdistanê belav kir,  “Îro danê sibê hêzên çekdar ên Îranê li devera Nawsûdê ya parêzgeha Kirmaşanê gule berdan karwaneke kolberan û di encamê de 5 kolber birîndar bûn.”

Hingawê diyar kir jî, “Yek ji kolberên birîndar ê bi navê Eyûb Mihemedî yê ji Selasî Bawecanî, piştî ku ji bo Nexweşxaneya Qudsê ya bajarê Paweyê hate rakirin, ji ber giraniya birînên xwe canê xwe jidest da.”

Herwiha got, 4 gundiyên din ên birîndar jî ji aliyê tîmên tenduristiyê yên heman nexweşxaneyê ve hatin dermankirin. Lê rewşa wan a tenduristiyê nehat eşkerekirin, ji ber ku her çar birîndar li beşa lênihêrîna hûr de ne.

Hejmarek ji xelkê Rojhilatê Kurdistanê, ji bo dabînkirina debara jiyana xwe, bi rêyên dijwar û çiyayî, têne ser sînorên Herêma Kurdistanê û karê veguhestina kelûpelan dikin, lê belê salane hejmarek ji wan bi guleyên hêzên Supaya Pasdaran a Îranê tên kuştin û birîndarkirin.