Şahmaran an ku şaha maran ku serê wê jin, gewdeya wê jî ji maran e wek efsaneyeke mîtolojîk tê zanîn, li xan û mala gelek Kurdan wêneyê wê hatiye aliqandin, di helbest û awazên dengbêjan de jî tê behskirin li Stenbolê bi pêşangeheke berfireh hat nîşandan.

Di pêşangehê de 34 peykerên Şahmaran ku remza bereket û qencî ye ji aliyê 34 hunermendên cuda bi awayeke ji hev ciyawaztir hatin amadekirin.

Hunermend Haydar Akdag ji K24ê re got: “Min di vê berhema xwe de rengên pozîtîf bi kar anî da ku enerjiyekê li kesên berhemê temaşe dikin bê belavkirin. Bi vî awayî taybetmendiyeke erênî ya Şahmaranê û tesîra wê nîşan didim.”

Armanca pêşangehê ew e ku ev efsane û çîroka efsûnî ku zêdetir li ser erdnîgariya Kurdan tê zanîn li tevahiya dinyayê were belavkirin.

Dîrektora Pêşangehê Zeynep Helvaci dibêje: “Di platformên neteweyî û navneteweyî de danasîna Şahmaran baş nehat kirin. Şahmaran ji bo mirovahî peyamekê dide. Ji ber vê dixwazim Şahmaran ne tenê li erdnîgariya Mezopotamyayê li tevahiya cîhanê baş were nasîn û zanîn. Ev pêşangeha li Stenbolê jî ji bo vê mebestê pêngaveke girîng e.”

Kuratorê Pêşangehê Marcus Graf diyar dike: “Em çîrokekê ji vê herêmê bi vê pêşangehê li gor şertên serdema nû bi awayeke nûjen ji nû ve şîrove dikin. Em peyamên hêvî, şîfa, xiyanet û bawerî ku di çîroka Şahmaran de cîh digirin bi rêya hunerê digihînin mirovan. Pêdiviya me hemû mirovan bi şîfa û qenciyê heye, pêşangeh jî xizmeta vê pêdiviya mirovan dike.”

Peykerên Şahmeranên di vê pêşangehê de cîh digirin her yek heta 3 mehan li meydan û kolanên sereke yên li Stenbolê dê bên pêşandan û dahatên vê jî ji bo perwerdehiya keçikan dê bên dabînkirin. Bi vî awayî pêşangeh bo zarokan wê bibe qencî û şîfa ku wek remza Şahmaranê jî tê zanîn.