Wezîrê Tendirustiyê yê Hikûmeta Herêma Kurdistanê Dr. Saman Berzincî ragihand, li gorî amarên dawî, 30 haletên nexweşiya kolerayê li parêzgeh û îdareyên serbixwe yên Herêma Kurdistanê hatine tomarkirin.

Wezîrê Tendirustiyê daxwaz ji welatiyan kir, eger bi zikçûnê ketin û pêwîstiya wan bi çareseriya bijîşkî hebû, bila bilez serdana nexweşxane û navendên tenduristiyê bikin.

Dr. Saman Berzencî da zanîn, wan komîteyeke bilind ava kirine û bi wezaret û aliyên peywendîdar re di hevahengiyê de ne. Got jî, wan raporek ji bo rûbirûna kolerayê amade kirine û dê roja Çarşema bê di civîna Encûmena Wezîran de pêşkêş bikin.

Got jî: “Hin tedbîr hene ku divê niha ji bo kêmkirina haletên nexweşiyê bêne girtin. Di raporê de jî, me çend pêşniyarên demdirêj û çakkirina çavkaniyên ava vexwarinê jî pêşkêş kirine.”

Wezîrê Tendirustiyê got jî: “Bi bidawîbûna demsala havînê û destpêkirina demsala payîz û zivistanê, nexweşiya kolerayê dê nemîne, lê ev nayê wê wateyê ku nexweşiya kolera bi temamî li Iraq û Herêma Kurdistanê nemaye, belku di salên pêş de dê dîsa derkeve.”