Serokê Amerîkayê Donald Trump di civîneke çapemeniyê de li Koşka Spî axivî û li ser pirsa gelo ew dê dîsa êrişî Îranê bikin eger birêvebiriya Tehranê kapasîteya xwe ya nukleerî dewlemendtir bike bersiv da û got, “Teqez.”

Donald Trump diyar kir ku ew piştgiriyê didin ku Ajansa Navneteweyî ya Enerjiya Atomê (IAEA) an saziyeke din a bi prestîj çavdêriyê li Îranê bike û diyar kir ew “bawer nake” ku Tehran vegere ser xebateke nû ya nukleerî.

Serokê Amerîkayê Donald Trump destnîşan kir ku Amerîka xwedî alavên herî bipêşketî yên cîhanê ye anî ziman:

“Wan trilyon dolar ji bo bernameya nukleerî xerc kir, hemû çû.”

Donald Trump êrişên mûşekî yên Îranê yên li Baregeha Asmanî ya El-Udeydê ya Amerîkayê ya li Qeterê û Îsraîlê bi bîr xist û da zanîn:

“Eger te derbek xwaribe, divê tu rastiyê bibêjî. Îsraîlê jî derb xwar.

Her du jî ji van êrişan rizgar bûn û ew demeke baş bû ji bo kontrolkirina rewşê.”

Trump diyar kir ku Îran “di rewşeke perîşan de ye” û got:

“Min bi Îsraîlê re dan û standin kirin. Her duyan jî xwest ku ev pirsgirêk were çareserkirin û me karekî gelekî baş kir.”

Trump da zanîn ku Îran niha li ser mijara nukleerî nasekine û got:

“Tiştê dawî ku ew niha li ser difikirin nukleer e. Ew li ser sibehê difikirin, ew hewl didin ku bijîn.”

Xeze û agirbest

Donald Trump di civîneke xwe ya din a bi Rwanda û Komara Demokratîk a Kongoyê de qala Xezeyê û agirbesteke nû kir.

Trump hêviya xwe ya ji bo gihîştina agirbestê li Xezeyê nîşan da û pesnê rêkeftineke aştiyê ya “dîrokî” kir ku di navbera Rwanda û Komara Demokratîk a Kongoyê de hat îmzekirin.

Trump behsa şerê di navbera Îran û Îsraîlê û çend mijarên din ên cîhanî û navxwe jî kir.

Trump li ser Xezeyê geşbîniya xwe diyar kir û got:

“Em wisa difikirin ku rêkeftinek ji bo agirbestê nêzîk e û dibe ku hefteya bê em bigihîjinê.

Xelk li Xezeyê dimire û kes alîkariya şêniyên wê nake ku em dikin.”

Trump rêkeftina aştiyê ya di navbera Rwanda û Komara Demokratîk a Kongoyê de wekî “dîrokî” bi nav kir û ragihand:

“Ev destpêkeke nû ya hêvî û xweşguzeraniyê ye ji bo tevahiya herêmê.

Em zexteke zêde li her du welatan ji bo bicihanîna rêkeftinê dikin û heger were binpêkirin dê cezayên hebin.”

Trump di beşeke din a axaftinên xwe de amaje bi wê yekê da ku ew li ser pirsgirêka di navbera Hindistan û Pakistanê de dixebitin û daxwaza xwe ya ji bo “çareserkirina hemû qeyranên cîhanê” nîşan da.