Wezîrê Derve yê Çînê Wang Yi bi navbeynkariya konsolosê xwe yê Hewlêrê Tan Banglin nameyek ji Serokwezîrê Hikûmeta Herêma Kurdistanê Nêçîrvan Barzanî re şand û ragihand ku ew dixwazin têkiliyên xwe bi Kurdistanê re bi pêş bixin.

Wang Yi di nameya xwe de daxwaz kir ku pirsgirêkên heyî yên navbera Hewlêr û Bexdayê bi rêya diyalogê, di çarçoveya Destûra Bingehîn de werin çareserkirin û divê herdu alî ji bo vê hewl bidin û xwe ji tundûtujiyê dûr bigrin.

Her wiha Serokwezîr Nêçîrvan Barzanî jî ji bo nameyê spasiya heyeta Çînê kir û di hevdîtinê de behsa girîngiya têkiliyên Hewlêr û Pekînê kir û xwest pêwendiyên ekonomîk ên herdu aliyan bi pêş bikevin.

Nêçîrvan Barzanî di berdewamiya axaftina xwe de got: "Hikûmeta Kurdistanê ji bo çareseriya hemû pirsgirêkan rêya diyalogê bijartiye û ji bo pirsgirêk bi vê rêbazê werin çareserkirin hemû rêyan diceribînin."