Li gorî zanyariyên ku ji çavkaniyên leşkerî yên artêşa Sûriyeyê hatine wergirtin leşkerên sûriyeyî ji aliye başûr ve ketin nava bajarê El Babê. Artêşê herî dawî şevê din gundê Ebû Taltal û Dery Kak bi dest xistibû û bajêr dorpêç kiribû.

Di operasyona rizgarkirina bajarê El Babê de Hêzên Piling ên artêşê jî cih girtin û fermandariya operasyonê yek ji leşkerên artêşê ku heta niha gelek cih ji destê rêxistina terorîst a DAIŞê derxistine Mîralay Suheyl Hassan birêve dibe.

Leşkerên artêşa Sûriyeyê bi piştgiriya balafirên şer ên Hêza Hewayî ya Rûsyayê bi pêş ve diçin û herî dawî li herêma siloyan bi DAIŞê re di şer û pevçûnê de ye. Di vê navberê de 3 wesayîtên bombebarkirî yên DAIŞê ji terefê artêşê ve hatin îmhakirin û li gorî zanyariyan DAIŞ di şer de sivîlan wek mirtal bi kar tîne.

Bajarê El Babê 40 kîlometro dûrî sînorê Tirkiyeyê, 35 kîlometro jî dûrî Helebê ye û derdora 60 hezar însan lê dijîn. Bajar di sala 2012an de ji terefê Artêşa Sûriyeya Azad (ASA) hatibû bidestxistin û di sala 2014an de jî bajêr ketibû destê DAIŞê.