Serokê Rêxistina Çavdêriya Mafên Mirovan a Sûriyeyê (SOHR) Ramî Ebdulrehmanê ku çavdêriya şer û rewşa Sûriyeyê dike got:

“Balafirên şer ên Îsraîlê baregehên leşkerî yên li navçeyên Kisweyê û Muqeylîbeyê yên li derveyî Şamê bombebaran kirin.”

Heta niha agahî li ser zererên canî nehatine belavkirin û artêşa Îsraîlê jî ti daxuyanî li ser vê êrişê nedane.

Medyaya fermî ya Sûriyeyê da zanîn:

“Dagirkeran derdora bajarê Kisweyê bombebaran kir.”

Êriş di demekê de ye ku berî 24 saetan Îsraîlê êrişeke bi heman awayî kiribû û ew bû sedema kuştina 13 kesan.

Artêşa Îsraîlê dabû zanîn ku wan “balafirgeha leşkerî ya herî mezin a artêşa berê ya Sûriyeyê” li Derayê kiriye armanc.

Rayedarên parêzgehê ragihand ku di encama êrişê de herî kêm 9 kesên sivîl hatine kuştin.

Wezareta Derve ya Sûriyeyê jî di daxuyaniyeke nivîskî de êriş şermezar kirin û wekî “binpêkirina eşkere ya serweriya axa xwe” bi nav kir.