Endamê Komîsyona Navendî û Biryarder a AK Partiyê Orhan Mîroglu, Parlamenterê AK Partiyê yê Amedê, Galîp Ensarîoglu, parlamenterên berê yê AK Partiyê Mehmet Metîner û Abdurrahman Kurt jî beşdarî konferansê bûn.

Di dawiya konferansê de encamnameya konferansê hat ragihandin.

Di emcamnameyê de daxwaza perwerdeya bi zimanê dayîkê, bi destûrê parastina Kurdî, guherîna destûrê, guherîna pênaseya "her kes Tirk e" hat kirin.

Her wiha di encamnameyê de hat destnîşankirin ku divê destûra darbeyê ya ku berhema zîhniyeta kemalîst e û çavkaniya pirsgirêka Kurd e, bê guhertin.

Ev yek di navbera Şewirmendê Serokkomarê Tirkiyeyê Mehmet Uçum û Orhan Mîroglu, Mehmet Metîner û Abdurrahman Kurt de bû sedema nerazîbûnan.

Berteka Şêwirmendê Erdogan

Şewirmendê Serokkomarê Tirkiyeyê Mehmet Uçum li ser hesabê xwe yê Xê daxuyaniyek belav kir û bi tundî bertek da encamnameya HUDA PARê û ew komxebat wekî "îxanet" bi nav kir.

Her wiha Uçum got ku "Li hemberî armanca Tirkiyeya bê teror îxanet bi bêşermî zêde dibin."

Uçum got, "Yek bi yek bandora Înîsiyatîfa Dewletê ya ku bi tevgerên Birêz Bahçelî û nêzîkatiyên Serokomar Erdogan ên 1ê Çiriya Pêşîn û vir ve ket meriyetê ev e ku hemû alîgirên projeya parçekirina emperyalîst yek bi yek hatin eşkerekirin.

Yên ku di qonaxa nû ya destpêkirî de ji bo ji holê rakirina bingehîn a pirsgirêka terorê îstîsmar dikin, di bêedebiyê de gihiştin lûtkeyê.

Yên ku qaşo bi navê komxebata çareseriya însanî, projeya pirsgirêka Kurd a derve ya emperyalîst a ku armanca wê parçekirina Tirkiyeyê ye, wekî referans girt, di daxuyaniya xwe ya dawî de bi awayekî vekirî û bêşerm îlan kir ku ew alîgirê parçekirina Tirkiyeyê ne."

"Bila kes serî li qurnaziyan nede"

Li aliyê din, parlamenterê berê yê AK Partiyê Mehmet Metîner bêyî ku nav bide li ser hesabê xwe yê Xê bersiv da Mehmet Eçum.

Mehmet Metîner got, "Ez endamê AK Partiyê me, ne yek ji wan kesên ku xwe AK Partiyî nîşan didin im.

Di her platformên ku beşdarî wan dibim de ez yek ji wan kesên ku ruhê damezrîner ê Serok (Reîs) û AK Partiya me diparêzin im.

Di gotara ku min di çalakiya HUDA PARê ya li Amedê de pêşkêş kir de jî min heman ramanên ku min heta niha di nivîsên xwe yên quncikan û li ser ekranan de parastine anîn zimên."

Metîner diyar kir ku ew pênaseya "meseleya Kurdan" şaş dibîne û got, "Ez bawer dikim ku têgihiştina yek dewlet, yek milet, yek al û yek welat li gorî baweriya me û tecrûbeya me ya dîrokî ye.

Ji ber vê yekê daxwazên federasyon û xweseriya li ser bingeha etnîkî dê bibin sedema perçebûnê."

Metîner diyar kir ku divê zimanê fermî û zimanê perwerdeyê tenê Tirkî be û destnîşan kir ku zimanên din dikarin di qada giştî de bên fêrkirin û hînkirin.

Her wiha Metîner got, "Cudakirina bajarên me wekî yên Tirk an Kurd şaş e. Em him Tirk him Kurd him jî Ereb in, em bi hev re Tirkiye ne."

Metiner piştgirî da banga Bahçelî ya ku "divê PKK bêyî merc çekên xwe deyne."

Metiner got, “Bila derfetê wekî xenîmetê nebînin û qurnaziya bi kevrekî çend çûkan kuştinê nekin.

Ez dixwazim wekî gotina dawî bibêjim: Ez zimanê daxuyaniya dawî ya çalakiyê napejirînim.

Ez hin pênasekirinên ku li wir hatine kirin û hin daxwazan red dikim ji ber ku ez wan li dijî têgihiştina xwe dibînim."

"Gelo hinekan dengê derbeyê bihîst"

Endamê Komîsyona Navendî û Biryarder a AK Partiyê Orhan Mîroglu ku beşdarî konferansê bûbû jî bertek da Mehmet Uçum.

Mîroglu got, "Ez yek ji wan siyasetmedarên AK Partiyê bûm ku beşdarî çalakiya HUDA PARê ya li Amedê bûm.

Min axaftineke silavdanê kir, min li panela yekem guhdarî kir û ji ber bernameyên min ên din ez piştî panela yekem veqetiyam.

Min daxuyaniya dawî di van saetan de xwend, hûn dikarin bipejirînin an jî nepejirînin.

Lê ma gelo cewhera ku hûn jê re dibêjin diyalog, muzakere û demokrasiyê ne azadiya îfadekirina ramanên cuda ye?

Ji ancamnameya komxebatekê bi gotina nemerd dest pê kirin û encam derxistin, ji min re wekî hinceteke ku dixwaze tiştekî bide xuyakirin tê! Gelo hinekan dengê pêleyên derbeyê bihîst ku hewl didin Kurdan bikin hincet?!

Lê mixabin ev hevalê me her car dîrok û têkoşînên têkildarî Kurdan, bîra têkiliyên Tirk û Kurdan înkar dike, di nav cîhana ramanan a nijadperestan de diçe û tê ku hîn jî "Kart-Kurt"ê diparêzin, û rastiya Kurd a li hewşa me ya paş jî bi peyvên bêwate yên wekî 'pirsgirêka derve ya Kurdên emperyalîst' tîne zimên û parvekirinên ku rûmetê dişkînin dike.

Armanca êrişkirina bi vî awayî li ser wan kesên ku ji bo 'Tirkiyeya bê teror' berdêlên herî giran dane û navên wan ji lîsteyên îdamê derneketin, nikare 'Tirkiyeya bê teror' be!"

Kurt: Ne tiştekî li ser we bû

Parlamenterê berê yê AK Partiyê Abdurrahman Kurt ku beşdarî çalakiyê bûbû, li ser medyaya civakî bersiva rexneyên tund ên Mehmet Uçum da.

Kurt got,"Mehmet beg, di çarçoveya bernameyê de ji bo Misilmanan hat axaftin, ne hewce ye hûn li xwe bigirin. Ne tiştekî ku li ser we bû."