Di demekê de ku hilbijartinên serokomarî û parlementoyê yên Tirkiyê ku dê di 14ê Gulanê de bên sazkirin, nêzîk dibin, kompanyayên lêkolînan û rapirsiyan encamên xebatên xwe belav dikin.

Herî dawî, Kompanyaya Lêkolînê ya Asalê encamên lêkolîna xwe ya ku di navbera 25ê Adarê - 2ê Nîsanê de li 26 parêzgehan pêk anî, eşkere kirin.

Di anketê de ji welatiyan hat pirsîn, "Eger vê yekşemê hilbijartin çêbibe hûn dê dengê xwe bidin kîjan partiyê?"

Di bersiva wê prisê de, li gor encamên ku Asalê belav kirine ji sedî 38.8ê kesên beşdar di anketê de gotine ku dê deng bidin AK Partiyê.

Herwiha ji sedî 23.2 kesên ku tevli anketa Asalê bûne, ragihandine ku ew dê dengê xwe bidin CHPê.

Li gor encaman, ji sedê 10.3 kesên beşdar di anketê de dengê xwe didin HDPê û MHPê jî ji sedî 7.4ê dengan qezenc dike.

Encama herî balkêş di anketê de kêmbûna dengê ÎYÎ Partiyê ye ku di anketên mehên bihorî de ji sedî 18 dengan jê re dihat diyarkirin.

Di anketa Asalê de li gor encamên ku hatine belavkirin, ÎYÎ Partî ji sedî 8.9 dengan bidest dixe.