Wek tê zanîn hefteya borî di ajansa ANHAyê de wek nûçeya lezgîn derbas bibû ku Tirkiye li sînorên Tel Abyad û Akçakaleyê leşkerên xwe bicih dike. Îro jî di rojnameya binavê Karar de cih digire ku ev bicihkirina leşkeran destpêka operasyonek ya Tirkiyeyê ye li Tel-Abyadê ango Girê Sipî.

Li gorî nûçeya Hîlal Ozturk ya nivîskara rojnameya binavê Kararê, dê hêzên Artêşa Tirk di nava mehekê de li herêmê dest bi operasyonekê bike. Di nûçeyê de her wiha tê gotin ku hedefa vê operasyonê jî Kantonên girêdayî PYDê ne ango kurd in. Di nûçeyê de her wiha tê gotin:"Artêşa tirk di navbera Kantonên Cizîr û Kobaniyê de ji Cerablûsê heya El Babê operasyonek ya wek "Mertala Firatê" bide meşandin. Ku operasyon biserkev e dê dê herêmê ji niştecihên ereban re vekin û ereban li wir bicih bike."

Li gorî nûçeyê, Artêşa Tirk bi vê operasyonê dixwaze herêmê dagir bike. Di nûçeya taybet ya Kararê de tê gotin ku Tirkiye dixwaze herêmê ji destê PYD, YPG bigire û li vê derê ereban bicih bike. Bi vî awayî herdû Kantonên di destê PYDê de jî ji hev dûr bixe.