Belê rast e û mafê gelekan ji me ye ku em behsa partiyên xwe yên kurd û Kurdistanî ne, bikin. Wan rexne bikin. Heta gelek caran ji rexneyan wêdetir em wan gunehkar jî dikin. Em dixwazin ew her karê xwe baş bikin û yên dikin jî ne bi dilê me be, em wan pir bi rehetî rexne jî dikin. Helbet ev heqê me ye…

Heger hûn rastiyê bixwazin êdî hin rexne an rexnegir ji hedê xwe derketine kar û barê wan tenê maye ku van partiyên me gunehkar bikin. Hemî kêmaniyên hene bikin hustiyên wan. Aha ev nabe.

Binêrin ez bi xwe jî gelek caran ji wê partiya jê hez dikim an dixwazim ew li kêmaniyê xwe hay bibin, rexne dikim. Hinan bi nav hinan jî bê nav rexne dikim. Çima ez vê dikim?

Ji ber ku ez dixwazim van partiyên me bi serkevin, bi karên ji wan tê xwestinê ve rabin, şaşî û kêmaniyên wan rexne dikim lê tim jî ji bona karên wan yên baş bûme û dibim pesindarê wan jî.

Hûn ya rastî bixwazin heq û mafê herkesan e ku kêmaniyên partiyên hene rexne bikin. Lê ne heqê herkesan e ku tenê li mala xwe rûniştîne, bi tu karekî siyasî û rewşenbîrî ve ne mijûl in, karên kesên weha tenê dibe rexnekirina partiyên hene.

Lê divê em carekê li rewşa welêt û kesên xwe binêrin û bibînin bê van partiyên me di çi rewş û halî de karê xwe ê siyasî dikin. Di rewşa îro de karê wan gelekî zehmet e. Li tirkiyê û li bakurê kurdistanê bi piranî rewşa averte heye. Di rewşên averte de mirov nikare weke rewşên normal karê siyasî bi rehetî bike. Dema me ew rexne kirin divê em vê rewşê bidin ber çavan.

Lê em dibînin û dinerin dîsa jî ew partiyên me li gor şert û mercên hene kar dikin û dixwazin ji bona gelê xwe tiştna bikin. Dikin jî. Helbet di nav kar de wê kêmanî çê bibe, şaşî dikare pêk bê.

Ez bi xwe jî di nav de gelek caran partiyên jê hez dikim rexne dikim. Divê em jî ango ew kesên bê rêxistin vê yekê baş bizanibin; Rêxistina herî xerab, ji bê rêxistiniyê baştir e. Qe nebe çend kes li ser hev in û ew dikarin bibin qawet, ew dikarin bibin hêz û rojekê ew dikarin bibin pêşevanê gelê xwe jî.

Kesên bê rêxistin şexseke û bibe agir jî ancax cihê lêye dikare bişewîtîne, zêde nikare here, xet û çerçewaya wan diyar e. Lê çi dema wan jî kedên xwe teva karê partiyan kirin ew jî dikarin bêtir bi pêşkevin.

Heta gelek caran em ew kesên bê rêxistin bi destên xwe dihêlin ku partî û rêxistinên me jî bê qawet û hêz bimînin. Ji ber ku partiyeke bi saya endamên xwe çalak e, xurt e, lawaz e. Çi dema partiyek bibe xwedî hêz û qawet, bibe xwedî pere û hebûn. Ez bawerim wê karên baştir bikin. Mînak:

Di rêxistinekê de çend nivîskarên qerase hebin, ew rêxistin dikare bibe xwediyê xwe û medyayeke baş, qenc û çalak. Heger di rêxistinekê de çend kesên dewlemend ku dikarin gelek tiştên hêja bikin hebin, ew partî dikare di demeke herî kind de gelekî bi pêşve here.

Kesên jêhatî, kêr hatî û çalak bibin endamê partiyekê helbet ew partî jî wê bi saya wan kesana çalaktir bibe û bêtir kar û xebatê bike.Ha hemî tişt ne tenê endam bûn e, mirov dikare bibe terefdarê wan. Dostên wan î herî nêzîk û bi saya vê dostaniyê jî alîkariya wan bike.

Helbet ji bona kesên weke min bê rêxistin, gelekî rehet e ku mirov partiyan rexne bike. Helbet ev heqê me re ye. LÊ divê mirov destê xwe bide ser wijcanê xwe, li dora xwe û li rewşa welatê xwe binêre û qise û rexne bike, wê ew rexnên me re bêtir cihê xwe bigire.

Gelo em qet carekê jî be li ser pêwîstiyên wan rawestiya nin?NA dibêjim. Ji ber ku îro pêwîstiya medyayek xurt li ser xeta neteweyî lazim e. Lê partiyên me li gor îmkanên xwe nikarin vê pêk bînin. Gelo çima ew kesên me yên xwedî pere û tim karê wan rexnene an bê deng in, bi alîkariya wan ve rabin. Ji wan re tv yekê û medyayek xurt venakin û pêk nînin.

Madem ku em hevdu temam dikin, madem heqê me ye em partiyên xwe rexne bikin, lê divê em heqê wan jî bidin wan. Li gor min heta ku mirov nede divê mirov rexne jî neke. Ha dayîn çi ye. Hin bi perên xwe, hin bi sexsê xwe, hin bi nivîsên xwe û hin jî bi mejî yê xwe dikarin partiyeke herî xurt li bakurê kurdistanê damezrînin an yên hene xurtir bikin.

De ka werin, ez bi xwe jî di nav de em heta demekê rexnên xwe dînin alîkî û bi alîkariya partiyên xwe ve rabin, pêwîstî û lazimiyên hene bi hevre bînin cih. Kêmaniya wan temam bikin û dûre em ê binerin dema karê xwe nekirin aha wê gavê em êdî dikarin bi rexneyên xwe yên çêker agir berra kadîna wan din.

Ma ne piraniya me ku em dibêjin; Pêwîstiya bakurê Kurdistanê ji partiyek an ji eniyeke neteweyî, xurt û bi hêz heye. De ka werin em vê li gel partiyên xwe pêk bînin…