Li bakur û başûrê Kurdistanê, di nav kurdan de bi navê îslamê honandina hêzên îslamîst, ji destpêka 2010 an û virde, roj bi roj berfirehtir bûye. Ev honandina hêzên îslamîst, bi projeya Îran, Tirkîyê, a avakirina hêzên wekaletê ve girêdayî ye.

Di 19.12.2012 an de bi navê ''Hur Dava Partisi'' ku bi kurtnivîsa nav, HudaPar hat damezirandin. An jî damezirandina wê hat îlankirin. Vê partîyê di programa xwe de behsa pirsa Kurd jî, wek ku ''adet cîhê xwe bibîne“ bahs kir. Lê di eslê xwe de ticarî nêzî behsa pirsa Kurd û Kurdistanê nebû. Piranî di warê çalakîyên xwe de pqropaganda îslamê, Pîrozkirina rojbûyana nebîyê misilmanan û van salên dawî jî propaganda DAÎŞê, Hizbullaha libnan-Îranê, Hamasê ve hat naskirin.

Ji destpêka 2010 an û virde hêzên îslamîst (pirbiçek an jî bêçek) li ser axa Rohilata Naverast, yek bi dû yekê de hatin damezirandin, tevlihev bûn, ji hev veqetîyan, an jî ênîyên şer û tifaqan avakirin. Bi ''buhara ereban'' re ev pêl gihîşt axa dewleta Sûrîyê û Sûrîyeyê jî girt nav xwe.

Ev qeyranên li welatên dîktator yên ereban de, rê ji Îran û dûre jî ji Tirkîyeyê re jî vekir ku ji xwe re hêzên wekaletê ava bikin.

Bi destpêkirina şerê navxweyî yê Sûrîyeyê re Tirkîyê jî daket qada têkilîyên bi hêzên îslamîst re. Helbet berê jî têkilîyên Tirkîyê bi El Qaîde û İxwanî Mislim re hebû. Lê piştî îhtîmala ku li Roavayê Kurdistanê jî herêmek defekto ji bona kurdan bêt avakirin, Tirkîyê jî dest dirêjî hêzên Îslamîst yên li Sûrîyeyê kir. Tirkîyeyê jî ji xwe re li ser axa Sûrîyê hêzên wekaletê avakir. Bi wan şerê kurdan meşand.

Ev projeyên Tirkîyê û Îranê, îro li ser axa Rohilata Naverast gihîştîye astek metirsîdar. Bi dehhezaran hêzên îslamîst û pirbiçek, bêçek di bin emrê van herdû dewletan û Katarê de li ser sahê tevdigerin.

Yek ji van hêzan jî HudaPar e. Ji bona parastina hêza terorê ya HAMASê, ji HudaParê re ne tiştekî tesadufî ye. Ev stratejîyek a herêmê, ya hêzên wekaletê ye û HudaPar jî di nav vê projeyê de yek ji hêzên wekaletê ye.

Bi rîya HudaParê, Tirkîyê û Îranê dixwazin kurdan jî bikişînin nav vî şerê wekaletê. Di virde armanc, bêîtîbarkirina doza miletê Kurd û Kurdistanê ye. Dixwazin bi vê mebestê, doza miletê Kurd ji xeta xwe derkeve û bibe hêzek wekaletê a dijminan. Ev jî tê wateya têkbirina doza miletê Kurd û Kurdistanê bi xwe ye.

HudaPar, hêzek legal a Hizbullah a îlegal e. Hizbullah, hêzek taşeronî ya dewleta Tirkîyê; ku di kûraya odeyên dewleta Tirkîyeyê de hatibû avakirin. Tilîya vê hêzê di kujtina rojnamevan Halit Güngen, Cengiz Altun, Hafiz Akdemir, Yahya Orhan, Çetin Abaday û bidehhezaran kurdan de heye.

Di vê demê de ji her meslekî Kurd, dihatin revandin, îşkence dibûn û bi îşkencê pirs ji wan dihatin kirin, dihatin qetilkirin. Ev lêpirsîn jî hemû hatine qeydkirin û ketine destê polîs û mahkemên tirkan. Bi hezaran bandên fîlmên îşkencê di dosyayê dadgehên tirkan de hene!

Piştî radestkirina rêveberê PKK Abdullah Ocalan, ev revandin, bi biryara dewleta tirkan, kujtin hat sekinandin. Piştî demekê jî li ser Hizbullahê operasyonê destpê kir. Bi vê operasyonê re peralel, operasyona Ergenekonê jî dimeşîya. Bi sedan kes di dadgehên tirkan de li xwe mikur hatin. Têkilîyên Hizbullah û Jîtemê û Qurmaya Giştî ya Tirkîyê ve hatin girêdan. Bi hezaran rûpelên lixwe mukurbûnê, eşkerekirina têkilîyên wan bi dewleta tirkan re hatin tomarkirin. Lê piştî 2012an ev dosya hatin girtin, kesên ku di van dosyayan de dihatin tometbarkirin, yek bi yek hatin berdan. Beşa Ergenekonê bi îktîdara AK Partî re, beşa Hizbullah jî pêşî derketin Îran, vegerîyan Rohilata Naverast û dû re jî hatin Tirkîyeyê û HudaPar ava kirin!

Kurdbûna HudaPar, qet ne mijarek girîng e!

Li ku, çi diparêze pirtir, hêla wê a ku çi ye girîng e! Heger em daxûyanî, têkilî û çalakîyên HudaParê deynin ber analîzan, emê bibînin ku HudaPar, ji kurdbûna xwe bêtir, xizmetê ji têkilî, armancên xwe û taşeronîya xwe re dike. HudaPar, hêzek legal a Hizbulaha îlegale û wê kengî ev hêz vegere ser asta Hizbullahê ne dîyare. Ev bi mercên herêmê û taybet bi rewşa Kurdistanê ve girêdayî ye.

Divê Kurd, rewşenbîrên kurdan, sîyasetmedar û partîyên kurdan, zanayên kurdan, pîsporên kurdan; rastîya HudaParê derxin astek zanistîyê û li henber wê bibîryar rawestin. Derîyên xwe bi carekê de li henber vê partîyê bigirin. Wan negirin têkilî, çalakî û hevdîtinên xwe. Divê di her astê de eşkere bikin ku HudaPar ne hêzek Kurd e û ti têkilîya HudaParê bi doza Kurd û Kurdistanê re tine.

Dardakirina posterê serokê HAMASê, ala HAMASê li ser Bircên Amedê, ruhê vê hêzê û mesajên vê hêzê û nîyeta xerab a taşeronî ya vê hêzê dide kurdan.

Divê Kurd li henber vê lîstika dijmin hişîyar bin û rê nedin ku dijmin wan ji xwe re di nav van hêzên wekaletê de bikar bîne.

Bu makalede yer alan fikirler yazara aittir ve Nerina Azad'ın editöryal politikasını yansıtmayabilir.