Siyasetmedara xeta PKK û tevgera wê a legal Leyla Zana; piştî heft salan, ku di ser komkujîya Kurd a di xendekan re derbas bû, derket mazatê. Piştî heft salan Leyla Zana peyivî. Ev heft sale Leyla Zana devê xwe band kiribû û nedipeyivî. Di mala dîya xwe de hepiskirî bû.

Gelo kê dengê Leyla Zana qut kiribû?

Kê ji Leyla Zana re got; „êdî derkeve bipeyive û van mesajan bide?“

Leyla Zana çima piştî heft salan derket holê û raser got; „muhatabê çareserkirina pirsa Kurd Tayip Erdogan û Abdullah Ocalan“ e?

Dewletê û PKKê, A. Ocalan dixwazin çi bikin?

Parastina Salahattin Demirtaş û piştî heft salan derketina Leyla Zana a qada axavtinê tên çi wateyê, gelo tesadûf e?

Di virde xwestin Leyla Zana çi bêje?

Leyla zana li ser komkujîya xendekan çi got û çima rastî negot, an jî çima nabêje?

Leyla Zana çima heft salan xwe di mala dayîka xwe de hepis kiribû, ne dipeyivî û berpirsîyarîya xwe a li henber „gel“ neanî cîh û îro bi „hêsrên çavan“ re derket ber me?

Bawer bike Leyla Zana, ewên ku heft salan devê te band kir û yên ku îro ji te re got „ceza te xelas bûye, derkeve bipeyive“(!) eynî kesin an jî hêzin!

Gelo ev durustîye?

Siyasetmedara xeta PKK û tevgera wê a legal Leyla Zanayê diyar dike ku ew „ne xeyîdiye lê piştî bûyerên xendekan ew ketiye şînê“(!)

Gelo çima Leyla Zana, hemahengîya PKK û dewleta tirk, ku bi hev re di xendekan de bi hezaran xort û keçên kurdan qetilkirin, malên wan wêran kirin, koçber kirin zelal nake?

Leyla Zana qezda doza Kurd û Kurdistanê dike û dibêje;

"Ev doz ji hemû şexsiyetan pir mezintir e“(!)

Madem ev doz ji doza hemû şexsîyetan mezintire, çima Leyla Zana, wê qatlîama xendekan eşkere nake û dernakeve ber PKK û Dewleta tirk û bi durustî, bi berpirsîyarî nabêje; PKK û dewleta tirk bi hev re ev qatlîam a li ser miletê Kurd meşîya pêkanîn. Armanca wan li seranserê sînorê Roavayê Kurdistanê û bakurê Kurdistanê ji holê rakirina bingeha Kurdperwerîyê bû. Eger bi Leyla Zana re piçek mirovatî, durustî û însanîyet hebûya wê ew rojên bi qirêj, ewên pişt wan ewrên reşî tarî, ew qulên tarî û hemahengîya di navbera PKK û dewleta tirkan de, di navbera artêşa tirkan de, di navbera hêzên paramilîter yên dewleta tirkan de eşkere bikira

Salahattin Demirtaş, di parastina xwe de li ser komkujîya kurdan a xendekan hinek tiş zelal kir. Di eslê xwe de di serî de min nivîsîbû ku devlet û PKK li pişt Kurdkujîya xendekan bû. Lê S. Demirtaş bi devekî yek ji qadroyên vê pêvajokê a tevgerê hinek tişt eşkere kir. S Demirtaş eşkere kir ku;

„Bûyerên xendekan li henber îktîdarê ji bona kudetayek leşkerî Fetoyan, dewletê, hêzên dewletê yên leşkerî ku li herêmê û PKK bi hev re çêkir!“

Gelo ji dêlva ku Leyla Zana „7 salan şînê“ bike, çima derneket û hesab neda miletê Kurd û Kurdistanê? Ji dêlva bêdengîya xwe a heft salan, çima ew berpirsîyarên wan qatlîaman neanî ziman?

Leyla Zana dibêje; “Di 2015an de erdhejeke siyasî rû da.“

Çi bû ew erdheja sîyasî û kî bûn ew aktorên wê erdhejê, ku bi hezaran Kurd hatin qetilkirin? Bi rojan cesedên me li kolanan bêxwedî man! Ji dêlva Leyla Zana hewlê bide xwe ku bi „hêsrên xwe“ kurdan bixapîne, bila derketa û ev qirêjîya di navbera dewleta tirk û PKK de eşkere bikira!

Leyla Zana bi rehetî dibêje;

„Bi taybetî di dema xendekan de bi rastî em gihîştin asteke ku muxatabiya siyasî rawestiya.

Di wê serdemê de jî min dît ku dema em rûbirûyî girseyê dihatin tu bersiveke me tune ku em bidin. Yek ji sedemên bêdengiya min jî ev bû.“ Leyla Zana, ew „muhatabîya sîyasî“ çi bû gelo, mîsyona wê muhatabîyê çi bû?

Başe çima îro Leyla Zana wê bersîvê nade girseyê û nabêje ku kî û kîjan hêz bûn sebebê wan qatliamên Sûrê, Nisêbînê, Cizîrê û Şirnexê? Madem berî wê demê muhatabîya wê a sîyasî hebû çima eşkere nake? Rolê PKK di hilweşandina van bajaran de çi bû?

Leyla Zana dibêje; „Civak li benda bersivê ye û tu nikarî bibî bersiv. Ev rewş bû sedema şîna min a 7 salan. Ez pir êşandim. Jiyan tenê ne hilbijartin in.“(!)

Belê Leyla Zana, ji dêlva tu heft salan şînê bike û hêsrên sexte bibarîne, te di wan heft salan de bersîva civatê bidaya. Îro jî Kurd, maxdûrên Sûra Amedê, Nisêbînê, Cizîrê û Şirnexê ne û li benda bersîva tene. Çima tu bersiva wan nade?

Kî bûn ewên ku bi hev re ew tofan anîn serê miletê Kurd?

Lê tu rast nabêje Leyla Zana û tu li henber miletê Kurd jî ne xwedî wîcdane û ne durust e. Eger tu durust bûya, ji dêlva te bigota;

“Na, ev doz ji hemû şexsiyetan pir mezintir e, dozeke pir berfirehtir e. Ma mirov ji dozê dixeyîde? Eger mirov ji dozê bixeyide, mirov ji xwe dixeyîde.”(!)

Tenê ew kesên ku heft salan devê te band kirin û tu mahkûmî hepsa mala dîya te kirin, te yê ew eşkere bikirana. Teyê ew komkujîya zarokên Kurdan a xendekan, ew tiştên tarî eşkere bikira!

Tu dibêje, “Min ji Erdogan re got qulên tarî“(!) Başe çima tu wan qulên tarî ji T. Erdogan re dibêje, çima tu ji miletê xwe re, ji maxdûrên komkujîya xendekan re eşkere nake û nabêje. T. Erdogan dizane wan qulên tarî çi ne û kî di wan qulan de hene! Lê miletê Kurd nizane bê kî di wan qulên teyî tarî de hene!

Yek ji wan kesên ku di wan qulên tarî de xwe veşartîye jî A. Ocalan e, lê tu dibêje;

“Kesên ku dixwest bêyî Ocalan û Erdogan vê pirsgirêkê çareser bikin hebûn, wan digot em dê di nav xwe de vê pirsgirêkê çareser bikin.“

Ka tu çima wan kesan eşkere nake? Lê tu carek din wan kesan pêşnîyar dike ji dewleta tirk re ku ew muhatab bin.

Durust bûn, xwedî lêderketina wîcdan tiştên pir pîrozin Leyla Zana! Bawer bikin we ew durustî û ew wîcdan jî wenda kirîye. Tu êdî ne ew Leyla Ber zîndana Dîyarbekirê ye.

Bu makalede yer alan fikirler yazara aittir ve Nerina Azad'ın editöryal politikasını yansıtmayabilir.