Rojhilata Naverast, carek din raserî çelqandinek mezin dibe; lê hîn ne dîyare, ev boranek nû ye, yan herêm ber bi erdhejek pilebilind ve diçe!

Şerê Xezayê ku HAMASê destpê kir, 300 rojên xwe derbas kir. Ev şerê HAMASê bû sebebê kujtina bi dehhezaran mirovên medenî.

Îranê, xwe bi hêzên çekdar yên wekaletê re carek din daxist qadê. Ji Yemen bigire, heta Libnanê, Sûrîyê û İraqê ev hêzên terorê yên biser Îranê ve beşdarî şer bûn. Cîh bi cîh binkeyên Emerîka, yên Hêzên Hevpeymanan ketin hedefên van hêzan. Başûrê Kurdistanê jî nesîbê xwe ji vê dijminatîya Îranê girtî ye.

Hêzên Hûsîyan yên Yemenê xeta bazirganî a cîhanê xist astek metirsîdar û heta niha bi dehan keştîyên bezirganîya cîhanê ketin bin banddora van êrîşên Hûsîyên Yemenê, ku biser Îranê ve ne.

Hizbûlla a li Îranê û Sûrîyeyê jî beşdarî van êrîşan bûne. Li İraqê jî Haşdî Şabî, bi êrîşên ser binkeyên leşkerî yên Hêzên Hevpeymanan û Emerîkayê beşdar bûye.

Ev hêz hemû di bin destê Îranê de; Îran, wek heyştpêyekê (Axdapotê) li dervê axa xwe, di nav şer de ye.

Ev hêzên ku navên wan derbas dibin, hemû yeko yeko di hedefên Îsraîlê de ne û qenaat ewe ku; heta pişta van hêzan neyê şikenandin, şer li Xezayê nayê rawestandin û derbasî dan û stendinan nabe! Ku bibe jî, wê bi destê Îranê, ev hêz nehêlin ku li ser têkilîyê Îsraîl û Felestînê tiştek erênî derkeve holê.

Îsraîlê, di nav van alozîyan de, li mala rejîma Îranê, serkirdeyê HAMASê bi sûîkastêkê kujt. Ev îşaret ew bû ji Îranê re ku; „ev tevlihevîyên we bidomin, kesek ji we ne di bin ewlehîyê de ye.“

Îşaretên hewldanên geşkirina şer hene yek ji van:

Li gorî kenala El-Hedath a Siûdî; „roja Pêncşemê, Sererkanê Artêşa Sûriyê General Ebdulkerîm Mehmûd Îbrahîm bêyî agahdarkirina Serokê Sûriyê Beşar Esed serdana Îranê kir.“

Nûçeyek din: „Rûsya rê dide Îranê ku firokexaneyên xwe yên leşkerî li Sûriyê bikar bîne.“

Dema em sebeba çûna Sererkanê Artêşa Sûriyê General Ebdulkerîm Mehmûd Îbrahîm binirxînin; bi agahîyên yên nû ku dikevin medyayê de, emê bibînin Rûsîya bi vê İzindana firokeyên Îranê re, wê Îranê bi van firokeyan çek û teqemenîyan bikişîne Sûrîye û piştgirîya hêzên terorê bike.

Tê wateya ku Rûsîya jî beşdarî van hewlan bûye.

Îsraîl van tevger û dan û stendinan dişopîne û li kîderê bêhnek dijminane a ser Îsraîlê têkeve tevgerê, dike hedef ji xwe re.

Serkirdeyên HAMASê û Hizbûllahê di nav van dan û stendinan de ne. Ji ber wê jî yeko yeko bûne hedef ji hêzên Îsraîlê re.

Îran, Tirkîye û Sûrî, bi hev re li herêma Dêre Zorê, ku di destê Hêzên Emerîka-Hevpeymanan û HSDê (Hêzên Demodkratîk yên Sûrîyê) de ne, dest bi ceribandina tevlihevîyên mezin kirine:

Pêşî Eşîrên ereban xistin dewrê ku êsîr û girtîyên DAÎŞê bên berdan. Mercek wilo danîn ber HSDê ku; „Hûn êsîrên me bernedin, emê hêzên xwe ji nav HSDê bikişînin û we ji herêma xwe derxin. Ev dever ne yên kurdan e û emê hebûna we li vir qebûl nekin“(!)

Wek ku em dizanin ev eşîrên ereban hemû berê piştgirên Saddam bûn û piştî ku DAÎŞ derket holê, Piştgirîyek mezin dan DAÎŞê! Piştî ku dîtin wê DAÎŞ têk here, xwe bipaş de kişandin û di nav avakirina HSDê de cîh girtin ji bona ku xwe biparêzin. Aniha HSDê, li gor daxwaza van eşîran, bi hezaran şervanên DAÎŞ ku hemû qatîlin, tên berdan. Piranîyên van şervanên DAÎŞê bi BAAS a Îraqê ve ne û berê wan li Îraqê ye.

Piştî berdana van çekdaran bi çend rojan, van eşîran êrîş anî ser HSDê û Hêzên Hevpeymanan. Li pişt van êrîşan rejîma Sûrîyê, Îran û Tirkîye heye. Dixwazin li ser rewşa Sûrîyeyê gavên nû bavêjin. Helbet li pişt pîlanê van hersê dewletan jî Rûsîya heye, ku li gor daxwaza Îranê xeta hewayî a lojîstîkê ji Îranê re vedike, ev eşkere ye.

Ev 4 roje şer berdewam e. Di destê van eşîrên ereban de beşek êsîrên HSD çêbûne û van êsîran li henber HSDê bikar tînin.

Di qada navnetewî de, liser Îranê konsersûsek navnetewî neyê ava kirin û hedefa wê nebe têkbirina rejîma Îranê; ne mukûne ku pêşî li Îranê bêt girtin! Divê ev konsersûs roj berî roj di navbera yekitîya Ewrûpa, Îngîltere û Emerîkayê de bêt avakirin ku pêşî li Îranê bêt girtin.