Mixabin, bi mebesta hevkariyê di hilbijartina 24î pûşperê da danûstandinên di navbera Îtifaqa Kurdistanî Bona Hilbijartinê û Partîya Demokratîka Gelan (HDP)ê da bi ser neketîye, nûçe weha dibêje.

Mixabin, dibêjim ji ber ku wekî min hemû kesên li ser mijarê hûr dibûn, di gotar û nivîsên xwe da amaje bi giringîya hevkarîyek weha dikirin, ji ber kul i Tirkîyê sîstemek nû destpêdike, taybetî di tûra duyem da hê giringî bi dengê gele Kurd têt dayîn.

Min di hinek nivîsên xwe da, giringî li îtifaqek weha bardikir û wekî derfetek dîrokî ditît, ku îro ketîye destê siyaseta bakurê Kurdistanê.

Lê mixabin nebû, sedema pêknehatina jî di daxûyanîya Îtifaqa Kurdistanî û peyama M. Şerif Camci da eşkere dixuye.

Îtifaqa Kudistanî ku ji sê partî û du derdoran, wekî rayagiştî dizane ji Partîya Azadîya Kurdistanê (PAK), Partîya Sosyalîsta Kurdistanê (PSK), Partîya Demokrata Kurdistanê-Tirkîyê (PDK-T) û Însiyatîfa Tevgera Azadî û Platforma Demokratên Kurd (wekî PDK Bakuır jî têt naskirin) pêktêt; Îtifaqê, sedemên vê pêknehatinê li Amedê li Komeleya Rojnamegerên Başûrêrojhilat di civînek rojnamegerî da li rayagiştî ragihand.

Hinek malperên înternetê ev daxûyanî weşandin, di daxûyaniyê da têt ragihandin ku di destpêkê da hevdîtinên di navbera Îtifaqa Kurdistanî û HDPê da di çarçoweya “têgehiştinek hevpar” da baş derbas bûye, lê HDPê bilî ku Îtifaqê agahdar bike deklerasyona xwe ya hilbijartinê li rayagiştî eşkere kirîye, heta Îtifaq balê dikşîne ser ku du rojan berê ragihandina deklerasyonê agahdarî gihîştiye ber destê wana ku deklerasyon dê bêt ragihandin, li ser vê xwestine ligel HDPê peywendî damezrînin, lê bi ser neketine.

Ango, ji agahdarîya Îtifaqa Kurdistanî têt fam kirin, ku mixabin HDPê li berpirsyarîya xwe ranebû ye, ji dest vê hevdîtinên di navbera Îtifaqa Kurdistanî û HDPê bi serneketiye.

Min peyama Hevserokê Lijneya HDPê yê Amedê M. Şerif Camci di malpera ArtiGerçekê da xwend, ji peyama Camci jî têt fam kirin, ku agahdarîya Îtifaqa Kurdistanî rast e û HDPê bi berpirsyarîya xwe ranebûye, ji dest vê hevkarî encam negirtîye.

M. Şerif Camci kêşeya bi sernektinê wekî tiştekî “teknikî” nişan dide û weha dibêje, “Kê/kî çi kir, çi nekir, sûçdar kî/kê bû, çi bû, ji hemûya azade dibêjim ku di bingehê da pirs nebû.”

Ango, ji peyama Camci têt famkirin ku “bi devkî em wekîhev difikirin, lê bi niviskî û îmzakirina deklerasyonekî hevpar nabe”, ji ber ku di nava HDPê da hinek partî û grupên din hene, jixwe HDPê bi sere xwe partîyek tirkîyeyî û têkilî ye.

Ev gotina Camci bîranînek min anî bîra min, min carekê din jî nivîsa bû û bi bawerîya min girîng e ji ber ku asta hişmendîya girseya HDPê dide dest.

Sal 2014an dema ez vegerîyam li Semsûrê li nivîsgeha hevalekî rûniştibûm, hinek nasên din jî hebûn, wekî herdem dîsa guftûgoya me li ser siyasetê bû, mijar hat li ser siyaset û peyamên HDPê sekini; min got, divê HDPê taybetî li ser mafê zimên bisekine, daxwaza perwerdeya bi zimanê Kurdî û zimanekî fermî bike, hevalekî HDPî bersiva min da û got, “dema em daxwazek weha bikin hinek grupên di nava partîyê da dê qebûl nakir, ew dê nerehet bibin!”

Mixabin, HDPê di rewşek weha da ye, me “tirkîyebûn”a wê famkir, lê divê ew jî fam bike ku 90% dengê wê ji gelê Kurd têt, roja ku Kurd jê dûrbikevin, ew dê wekî masîya bê av bi sere xwe bimîne.

Him serokên wê û him jî rayadarên wê divê vê rastîyê baş fambikin û berjewendiyên gelê Kurd bikin ber yên partîyê.

Ez nebawerim ku welatparêzekî Kurd li dijî hevkarîya bi derdorên demokrat û dostên Kurdan be, berevajî qîmetek giranbûha didin dostên Kurdan.

Wekî Hevserok M. Şerif Camci jî dibêje, hevkarîya Îtifaqa Kurdistanî û HDPê dê li bakurê Kurdistanê sinerjîyek berfireh biafiranda û encamek serketî dê encam bida.

Hevkarîyek weha dê li ser peywendiyên partîyên parçeyên din jî karîgerîyek erênî bikira, lê helwesta HDPê ev derfet asteng kir.

Bila, temîya min li HDPê be, bi ya hinek kesên ku heta roja îro bi keda xwe nehatine neke, bila baş zanibe ku xwebawerîya wana qels e.

Bi vê helwest û siyasete HDPê deriye xwe li derfeta ber deriyê ra girt, ew dê zirarê bide partîyê û yekrêzîya siyaseta bakurê Kurdistanê, bêguman ev dê li kêrî kes û hêzên neyar bêt.